AQSh afg‘onistonliklarga mamlakatga kirishni taqiqladi

Oq uy yaqinidagi otishmadan so‘ng AQSh afg‘onistonliklarga mamlakatga kirishni taqiqladi va barcha uchun boshpana berishni to‘xtatdi.

Oq uy Immigrasiya xizmati direktori Jozef Edlou boshpana berish jarayoni “har bir chet ellik eng yuqori darajada tekshirilishi kafolatlanmaguncha” to‘xtatilishini ma’lum qildi.

Shu bilan birga, AQSh davlat kotibi Marko Rubio Afg‘oniston fuqarolariga viza berish to‘xtatilganini e’lon qildi.

Avvalroq AQSh Immigrasiya xizmati “xavf darajasi yuqori davlatlardan” kelgan barcha xorijiy fuqarolarning Grin-kartalarini sinchkovlik bilan tekshirish boshlanganini bildirgan edi. Bu ro‘yxatda Afg‘onistondan tashqari, yana 18 mamlakat, jumladan, Eron, Liviya, Somali, Kuba va Venesuela bor.

Bundan tashqari, prezident Donald Tramp Qo‘shma Shtatlarga “uchinchi dunyo mamlakatlari”dan bo‘lgan migrantlarning kirib kelishini to‘liq to‘xtatishga va’da bergandi.

26 noyabr kuni Oq uy yaqinida yuz bergan otishma natijasida AQSh Milliy gvardiyasining 2 nafar harbiysi og‘ir yaralangan, keyinroq ulardan biri vafot etgandi. Otishmada gumonlanib, 2021 yilda Afg‘onistondan AQShga ko‘chib kelgan 29 yoshli Rahmonulla Lakanval qo‘lga olingan.