Andijon va Xorazm viloyatlarida qalbaki aksiz markali alkogol mahsulotlarini sotuvga qo‘ygan savdo do‘konlari aniqlandi

Bosh prokuratura huzuridagi Departamentning Baliqchi tumani bo‘limi, IIB va Soliq inspeksiyasi xodimlari hamkorligida o‘tkazilgan tezkor tadbirda “Gulshan” MFY hududidagi oziq-ovqat do‘konida qonunga xilof ravishda alkogol mahsulotlari savdosi bilan shug‘ullanib kelgan fuqaro X.YU. xaridor G‘.M.ga 2 dona alkogolli ichimlikni sotgan vaqtida ushlanib, ushbu savdo do‘konidan tegishli kirim hujjatlari bo‘lmagan turli nomdagi 1 997 dona alkogol mahsulotlari ashyoviy dalil sifatida olingan.

Shu kabi, Departamentning Urganch tumani bo‘limi tomonidan o‘tkazilgan tezkor tadbirda tumandagi “N.B.” MCHJga qarashli savdo do‘konida 55 turdagi jami 1 052 qalbaki aksiz markali alkogol mahsulotlari sotuvga qo‘yilganligi aniqlanib, ushbu mahsulotlar ashyoviy dalil sifatida olingan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.