Agar Moskva tinchlikka erishishni istamasa, Vashington va Pekin uni bunga majbur qila oladi

Agar Moskva tinchlikka erishishni istamasa, Vashington va Pekin uni bunga majbur qila oladi — Zelenskiy.

Ukraina prezidenti mamlakat Rossiya bilan urushni diplomatiya yo‘li bilan yakunlashi uchun qo‘lidan kelgan barcha choralarni ko‘rayotganini aytdi. Uning so‘zlariga ko‘ra, Ukrainaning raqiblari va ishonchsiz manbalarga tayanadiganlarning asosiy da’volaridan biri Ukraina urush davom etishini xohlayotgani haqidagi mish-mishlardir.

Zelenskiy bu ayblovlarni izchil, asosli va ishonchli tarzda rad etish kerakligini bildirdi. U aynan Ukraina tinchlikni xohlayotganini va biror kun ham bu urushni istamayotganini ta’kidladi.

Ukraina yetakchisi mamlakat diplomatiya yo‘lida ishlayotganini va yordam bera oladigan barcha rahbarlar Kiyev har qanday mazmunli muzokaralar formatiga tayyor ekanini bilishini aytdi. Uning ta’kidlashicha, asosiy muammo Putinning muloqotga tayyor emasligidadir.

"Diplomatik yo‘l paydo bo‘lishi uchun dunyoning hech bir poytaxtida bunga g‘ov bo‘lmasligi kerak. Agar Moskva tinchlikni istamasa, Vashington va Pekin uni bunga majbur qilishi mumkin", — dedi Zelenskiy.

Shuningdek, u Rossiya “unchalik hisoblashgisi kelmaydigan” Yevropa davlatlarining ta’sirini oshirish uchun barcha imkoniyatlar ishga solinayotganini, natijada Rossiya Yevropani boshqa e’tiborsiz qoldira olmaydigan bo‘lishini qo‘shimcha qildi. Prezident yevropalik hamkorlar bilan xavfsizlik va siyosiy sohadagi hamkorlikning asosiy vazifalaridan biri ham aynan shundan iborat ekanini aytdi.