29 yoshli italiyalik sportchi vafot etdi

Italiyalik sportchi Matia Debertolis Xitoyning Chendu shahrida o‘tayotgan XII Butunjahon o‘yinlari chog‘ida hayotdan ko‘z yumdi. Bu haqda BBC Sport nashri xabar bermoqda.

Manbaga ko‘ra, 8 avgust kuni Debertolis sportiv-yo‘nalish bo‘yicha o‘rta masofadagi yugurish bahsida ishtirok etayotgan paytida, qattiq issiq tufayli hushidan ketdi.

Unga zudlik bilan tibbiy yordam ko‘rsatildi va kasalxonaga yotqizildi. Biroq shifokorlarning sa’y-harakatlariga qaramay, Debertolis 12 avgust kuni vafot etdi.

Musobaqa tashkiliy qo‘mitasi va Xalqaro sportiv-yo‘nalish federasiyasi marhum sportchining oila a’zolariga va yaqinlariga chuqur hamdardlik bildirdi. Shuningdek, ular Debertolis oilasiga zarur bo‘lgan ko‘mak ko‘rsatishga va’da berishdi.