Ekologiya vazirligi huzuridagi Jamoatchilik kengashining yangilangan tarkibi tasdiqlandi

29 avgust kuni Ekologiya, atrof-muhitni muhofaza qilish va iqlim o‘zgarishlari vazirligida vazirlik huzuridagi Jamoatchilik kengashining navbatdan tashqari yig‘ilishi bo‘lib o‘tdi. Vazir Aziz Abduhakimov raisligida bo‘lib o‘tgan yig‘ilish kengashning yangi tarkibini shakllantirish hamda uning galdagi faoliyati va istiqboldagi rejalari muhokamasiga bag‘ishlandi.

Yig‘ilishda nodavlat notijorat tashkilotlari, ekspert va ilmiy hamjamiyat, ommaviy axborot vositalari vakillari hamda blogerlardan iborat Jamoatchilik kengashining yangilangan tarkibi taqdim etildi. «Ekomaktab» NNT rahbari Natalya Shivaldova yana kengash raisligiga tasdiqlandi, «Qalb ekologiyasi» NNT rahbari Eshdavlat Suvonov esa uning o‘rinbosari etib tayinlandi. Shuningdek, kengash tarkibiga «Mehr va oqibat» nodavlat tashkiloti rahbari Nozimaxon Rahimova, «Yashil qurilish» bo‘yicha mustaqil ekspert Aleksey Svetlitskiy, Jahon iqtisodiyoti va diplomatiya universiteti dosenti Suriya To‘rayeva, «Falcon» MCHJ vakili Erkin Yo‘ldoshev, ekolog Feruzbek Sayfullayev, O‘zbekiston Ekologik partiyasi Toshkent shahar tashkiloti raisi o‘rinbosari Shahnoza Umarxo‘jayeva, O‘zbekiston Ekoforumi Toshkent shahar bo‘limi rahbari Zafar Ochilov, «O‘zbekiston 24» telekanalining siyosiy kuzatuvchisi Dilobar Yakubova, O‘zbekiston hayvonlar huquqlarini himoya qilish tashkilotlari koalisiyasi koordinatori Yelena Babenko, M.Ulug‘bek nomidagi O‘zbekiston Milliy universiteti doktoranti Shahnoza Saidova, mustaqil mutaxassis Nina Pikul, «Ekolog.uz» NNT rahbari Nargis Qosimova, Biologiya fanlari fanlari doktori, O‘zbekiston Fanlar akademiyasi Toshkent botanika bog‘i xodimi Davlatali Abdullayev, eko-faol blogerlar Mo‘’tabar Xushvaqtova va Aqida Mahirova, shuningdek, Qushlarni asrash uyushmasi rahbari Oleg Kashkarov kiritildi.

Yig‘ilishda Jamoatchilik kengashi to‘g‘risidagi nizom atroflicha muhokama qilinib, uning a’zolarining burch va huquqlari belgilab olindi, yaqin istiqboldagi faoliyat rejasi ko‘rib chiqildi. Atmosfera havosining ifloslanishini monitoring qilish va oldini olish, tabiiy resurslardan oqilona foydalanish, hayvonlarni asrash va muhofaza qilish, ekologik ta’lim, yashil texnologiyalarni rivojlantirish va boshqa dolzarb masalalar bo‘yicha asosiy yo‘nalishlar bo‘yicha ishchi guruhlarni shakllantirishga qaror qilindi.

Vazir Aziz Abduhakimov Jamoatchilik kengashi vazirlik faoliyatini, jumladan, normativ-huquqiy hujjatlarni tayyorlash, ekologik startaplarni qo‘llab-quvvatlash dasturlarini amalga oshirish va boshqa ustuvor vazifalarni ekspertiza bilan ta’minlashda muhim rol o‘ynashi mumkinligini ta’kidladi. Vazirlik har doim muloqot va yangi tashabbuslarga ochiq ekani, bunda jamoatchilik vakillarining ishtiroki uning ishini yanada shaffof va samarali qilishini ta’kidladi.

Vazir o‘z nutqi davomida Markaziy Osiyo atrof-muhit va iqlim o‘zgarishini o‘rganish universiteti («Green University») haqida ham to‘xtalib, uning O‘zbekistonda ekologik ta’limni rivojlantirishning yangi bosqichi sifatidagi ahamiyatini ta’kidladi. Uning so‘zlariga ko‘ra, ekologiya va iqlim o‘zgarishlari sohasida mutaxassislarning yangi avlodini tayyorlash mamlakat barqaror rivojlanishining muhim tayanchiga aylanadi.

Tadbirlar rejasini muhokama qilish chog‘ida vazirlikning Jamoatchilik kengashi va davlat ekologiya inspeksiyasi a’zolari ishtirokida sanoat korxonalarida qo‘shma nazorat tekshiruvlarini tashkil etish bo‘yicha taklif kiritildi. Bunday amaliyot qonunbuzarliklarni tezda aniqlash va atrof-muhit ifloslanishining oldini olish imkonini beradi. Bundan tashqari, vazir vazirlik tuzilmaviy bo‘linmalarining Jamoatchilik kengashiga muntazam hisobot berib borishini, shuningdek, ularning faoliyatini mustaqil baholash amaliyotini birlashtirishni taklif qildi.

Yig‘ilish yakunida Jamoatchilik kengashi faoliyatining batafsil rejasini ishlab chiqish bo‘yicha kelishuvga erishildi, bu dolzarb ekologik muammolarni hal etish bo‘yicha tizimli va samarali ishlar uchun asos bo‘ladi.