Italiya aeroportlarida ommaviy ish tashlash minglab sayyohlar uchun tahdid solmoqda

Italiyadagi aeroport ishchilari 26 iyul kuni to‘rt soatlik umummilliy ish tashlash o‘tkazadi, bu esa sayyohlik mavsumining eng yuqori cho‘qqisida o‘nlab reyslarning kechikishi va bekor qilinishiga olib kelishi mumkin.

Euronews xabariga ko‘ra, Italiyaning barcha yirik aeroportlarida mahalliy vaqt bilan soat 13:00 dan 17:00 gacha bagaj tashuvchilar, yer xodimlari va aeroport ishchilari ish tashlashadi.

Namoyishchilar ish joyida xavfsizlikni oshirish, mehnat sharoitlarini yaxshilash, kasbiy va shaxsiy hayot o‘rtasida sog‘lom muvozanatni saqlash kabi qator talablarni ilgari surmoqda. Bundan tashqari, ishchilar ijtimoiy kafolatlarni saqlab qolgan holda milliy mehnat shartnomalarini uzaytirishni talab qilmoqdalar.

Evropaning eng yirik aviakompaniyalari, jumladan EasyJet va Ryanair byudjetli aviakompaniyalari, shuningdek, British Airways, Wizz Air, Tui, Volotea va Italiyaning milliy aviatashuvchisi ITA Airways (sobiq Alitalia) zarar ko‘radi.

Vaziyat Ispaniya va Portugaliya aeroportlarida parallel ish tashlashlar sodir bo‘lishi bilan yanada og‘irlashmoqda, bu esa yoz mavsumi avjida minglab sayohatchilar uchun haqiqiy transport kollapsini keltirib chiqaradi.

Italiyada norozilik namoyishlari mamlakatning asosiy aeroportlariga ta’sir qiladi: Milan-Malpensa, Milan-Linate, Rim-Fiumisino, Florensiya, Neapol va Venesiya. Milan-Linate aeroportida ayniqsa qiyin vaziyat kutilmoqda, u yerda yo‘lovchilarni ro‘yxatdan o‘tkazish va darvoza xizmatlari uchun mas’ul Swissport xodimlari ish tashlashga qo‘shiladi.

Ispaniyada ish tashlash harakatiga Volotea aviakompaniyasi ekipaji va uchuvchilari boshchilik qilishdi, uning yo‘nalish tarmog‘i Yevropaning 100 dan ortiq shaharlarini qamrab oladi. Bu mashhur sayyohlik yo‘nalishlari orasidagi havo qatnovini jiddiy ravishda buzishi mumkin.

Eng uzoq davom etadigan norozilik namoyishi Portugaliyada kutilmoqda, u yerda Groundforce kompaniyasi (hozirgi Menzies Aviation nomi bilan tanilgan) ishchilari 26 iyul soat 00:00 dan 29 iyul 00:00 gacha uch kunlik ish tashlash e’lon qilishdi. Ularning harakatlari Lissabon aeroporti ishini amalda falaj qilishi mumkin. Bundan tashqari, namoyishchilar ish tashlashni avgust oyi davomida takrorlashni rejalashtirmoqda: 8 dan 11 gacha, 15 dan 18 gacha, 22 dan 25 gacha va 29 avgustdan 1 sentyabrgacha.