Yoaxim Lyov unga terma jamoadan taklif bo‘lganini tasdiqladi

Germaniya milliy terma jamoasining sobiq bosh murabbiyi Yoaxim Lyov klublar va bitta milliy assosiasiyadan murabbiylik lavozimi bo‘yicha bir nechta taklif olganini ma’lum qildi.

"So‘nggi bir-ikki hafta ichida menga murojaat qilib, suhbatlashishga tayyorligimni va qiziqishim bor-yo‘qligini so‘rashdi", – dedi u Frayburg yaqinidagi Rust shahridagi "Evropa parki" attraksionlar maydonida o‘tkazilgan tadbir chog‘ida.

U hozir bu takliflar haqida o‘ylab, tegishli jamoalar to‘g‘risida ma’lumot to‘playotganini aytdi. Keyingi bosqichda "hamkorligimiz samarali bo‘lishi mumkinmi" degan savolga javob topish uchun mas’ul shaxslar bilan uchrashuvlar o‘tkazishi mumkinligini bildirdi.

65 yoshli Lyov Germaniya terma jamoasi bilan 2014 yilgi jahon chempionatida g‘olib bo‘lgan. Murabbiy 2021 yilda terma jamoani tark etganidan beri ishsiz hisoblanadi.

Eslatib o‘tamiz, avvalroq O‘zbekiston futbol assosiasiyasi germaniyalik mashhur mutaxassis bilan muzokaralar olib borayotgani haqida xabar bergandik.