Yaponiyada 5 nafar o‘zbekistonlik hibsga olindi

Shibuya va Shinjukuda sodir etilgan bir nechta jinoyatlar bo‘yicha o‘zbekistonlik fuqarolar gumon qilinmoqda.

Tokio Metropolitan Polisiyasi poytaxtda o‘tgan yildan buyon sodir etilgan bir qator jinoyatlarda gumonlanayotgan besh nafar o‘zbekistonlik erkakni qo‘lga oldi, deb xabar bermoqda NHK.

2024-yil 30-dekabr kuni ertalab soat 5:30 dan sal o‘tganda, Hasanboy Marfjon O‘g‘li Dusmatov (21 yosh) va uning sheriklari Shibuya tumanidagi Maruyamacho ko‘chasida uch nafar chet ellik shaxsga hujum qilishgan.

Dusmatov ularning biriga, 21 yoshli erkakka, yuziga tepgan va keyin sheriklari bilan birga umumiy qiymati 210 ming iyenga teng bo‘lgan hamyonlar va sumkalarni o‘g‘irlashgan.

Jinoyat (bosqinchilik va tan jarohati yetkazish) gumoni bilan hibsga olingan Dusmatov “Advokatim kelmaguncha hech narsa demayman,” degan. Qolgan to‘rt gumonlanuvchi ayblovlarni inkor qilmoqda.

Dusmatov va yana uch gumonlanuvchi Yaponiyada noqonuniy ravishda yashab kelayotgan bo‘lgan. Jinoyatdan avval ular nishonga olingan guruhdagi ayol bilan “tanishishga” uringan (yapon tilida: nampa), shundan so‘ng jinoyat sodir etilgan.

Polisiyaning fikricha, Dusmatov va uning sheriklari o‘tgan yilning avgust oyidan buyon Shibuya va Shinjuku kabi gavjum hududlarda ko‘chada uxlayotgan odamlardan cho‘ntak o‘g‘riligi va boshqa o‘xshash jinoyatlar sodir etgan.

Ular o‘g‘irlangan kredit kartalar orqali iPhone xarid qilib, ularni qayta sotish orqali taxminan 8 million iyen daromad topgan bo‘lishi mumkin.

Polisiyaga ko‘ra, guruh yetakchisi aynan Dusmatov bo‘lgan. U Telegram orqali jinoyatlarning sanasi va vaqtini boshqalarga yetkazib turgan.

Hozirda tergov davom etmoqda.