Зеленский уч томонлама учрашувни имкон қадар тезроқ ўтказиш кераклигини айтди

Украина президенти Владимир Зеленский Украина, Россия ва АҚШ ўртасидаги янги уч томонлама учрашувни имкон қадар тезроқ ташкил этиш зарурлигини билдирди. Гап делегациялар ўртасида техник даражада ўтказиладиган музокаралар ҳақида бормоқда.

Зеленскийнинг айтишича, сўнгги икки кун давомида АҚШ президентининг махсус вакили Стив Уиткофф томонлар билан учрашув ўтказиш масаласини келишиб олган.

«Бизга берилган маълумотларга кўра, Россия делегацияларимиз даражасидаги уч томонлама учрашувни қўллаб-қувватламоқда. Америка томони уни имкон қадар тезроқ ўтказишни таклиф қилмоқда. Биз бу таклифни қўллаб-қувватлаймиз», — деди Зеленский журналистларга.

Украина президенти янги учрашувнинг аниқ санасини ҳозирча билмаслигини, бироқ музокаралар ноябрь ойи бошидан кечиктирилмаслиги керак, деб ҳисоблашини айтди.

Россия президенти ёрдамчиси Юрий Ушаков эса Уиткофф билан учрашувдан кейин музокаралар ноябрь ойининг ўртасида ўтказилиши мумкинлигини тахмин қилган.