Зеленский Россия-Украина можаросини ҳал этиш бўйича уч томонлама музокараларни Туркияда ўтказишни таклиф қилди

Украина президенти Владимир Зеленский Россия-Украина можаросини ҳал этиш бўйича уч томонлама музокараларни Туркияда ўтказишни таклиф қилди.

Зеленский бу ҳақда Анқарадаги матбуот анжуманида маълум қилган.

Унинг сўзларига кўра, Киев уч томонлама учрашувга тайёргарлик кўрмоқда. Туркия президенти Ражаб Тоййиб Эрдўғон билан музокаралар чоғида Зеленский бундай учрашувни Туркияда ўтказиш, шунингдек, Анқара, Европадаги ва Украинанинг бошқа ҳамкорларини ушбу жараёнга жалб этиш имкониятларини муҳокама қилган.

Бундан ташқари, Зеленский Украина ва Туркияни хавфсизлик ҳамда мудофаа саноати соҳасидаги иттифоқчилар деб атади. Унинг айтишича, музокаралар давомида икки давлат раҳбарлари Қора денгиздаги дон коридори фаолиятини йўлга қўйиш бўйича ҳам ҳамкорлик қилишга келишиб олган.

«Бу, биринчи навбатда, озиқ-овқат хавфсизлигига ҳам тааллуқли. Бугун биз президент (Эрдўғон — таҳр.) билан Қора денгиздаги дон коридори самарали ишлаши учун биргаликда ҳаракат қилишга келишиб олдик», — дея қўшимча қилди Зеленский.