Хитойлик олимлар ядровий оптик соат яратди

Хитойлик олимлар дунёдаги биринчи ядровий оптик соатни яратдилар ва унинг барқарор ишлашини таъминладилар.

Шундай қилиб, улар аниқ квант ўлчовлари доирасини атом ядроси даражасигача кенгайтирдилар. Бу ҳақда Xinhuа агентлиги хабар берди.

Қурилмани яратиш учун доцент Дин Шицян бошчилигидаги Цинхуа университети ва Пекин квант ахборот институти мутахассислари жамоаси 148 нанометр тўлқин узунлигига эга узлуксиз вакуумли ультрабинафша лазерни ишлаб чиқдилар. Шунингдек, улар торий-229 билан қўшилган кальций фторид кристалини яратдилар.

Диннинг сўзларига кўра, янги соатнинг частота барқарорлиги шунга ўхшаш лойиҳада иштирок этган европалик тадқиқотчиларнинг натижаларидан тахминан ўн баравар юқоридир.

— Ядровий оптик соат вақт ва частота учун янги авлод стандартига айланади. Унинг муваффақиятли яратилиши бу асрда квант аниқлик ўлчовлари соҳасида катта ютуқдир, — деди Цинхуа университети физика кафедраси мудири Чжай Хуэй.

Қаттиқ жисмли ядро соатининг яратилиши унинг келажакдаги ихчамлиги ва сунъий йўлдош навигациясида, шунингдек, чуқур космик тадқиқотларда қўлланилиши учун технологик асос яратади.