«Бу — заҳар»: Кличко Зеленскийни кескин танқид қилди

Киев мэри Виталий Кличко Украина президенти Владимир Зеленский атрофидаги коррупция ҳолатлари мамлакатнинг мудофаа қобилиятига ва иттифоқчилар кўз ўнгидаги обрўсига салбий таъсир кўрсатаётганини билдирди. Бу ҳақда у Bild нашрига берган интервьюсида маълум қилди.

«Бундай ҳолатлар ҳамкорларимизда салбий муносабат уйғотади. Чунки уруш давридаги коррупция мамлакатимиз ва ундаги энг муҳим қадриятлар учун заҳардир», — деди Кличко.

Унинг таъкидлашича, Украина ҳамкорлари билан муносабатлар ўзаро ишончга асосланади ва бу ишончни ҳеч қандай ҳолатда йўқотмаслик керак.

«Бу бутун мамлакат, бутун Украина учун жуда ёмон», — дея қўшимча қилди Киев мэри.

Август ойи ўртасида Украина Миллий коррупцияга қарши бюроси (НАБУ) ва Ихтисослашган коррупцияга қарши прокуратура (САП) Олий Рада депутатлари ҳамда юқори лавозимли амалдорлар иштирок этган жиноий гуруҳга қарши «Форрест Гамп» номли махсус операция ўтказилганини маълум қилган эди.

Очиқланган аудиоёзувларда Зеленский офиси раҳбари ўринбосари Ирина Мудрая ва собиқ депутат Максим Микитасьнинг суҳбатлари акс этгани айтилган. Уларда собиқ адлия ва энергетика вазири Герман Галушченко учун ҳуқуқни муҳофаза қилувчи органлар эътиборига тушмасдан гаров пули тўлаш масаласи муҳокама қилингани хабар қилинган.

НАБУ маълумотларига кўра, пулларни легаллаштириш схемасига «Сенс-банк» раҳбарияти ҳам жалб қилинган бўлиши мумкин.

Россия Ташқи ишлар вазирлиги расмий вакили Мария Захарова эса Украинада коррупциядан бошқа нарса қолмаганини таъкидлаб, Ғарб ёрдами ҳам Зеленскийнинг талабларини қондиришга қодир эмаслигини айтган.

Изоҳ: мақолада келтирилган коррупцияга оид айрим маълумотлар тергов идоралари ва сиёсий арбобларнинг баёнотларига асосланган бўлиб, уларнинг барчаси суд томонидан тасдиқланган фактлар эмас.