Ўзбекистонда ушбу ҳафта ҳаво ҳарорати кўтарилиши давом этади

Ўзбекистонда ҳафта ўрталарида ҳарорат 15 даражагача кўтарилиши кутилмоқда.

Прогнозларга кўра, 3 февраль, душанба куни кундузи ва иш ҳафтасининг охиригача Ўзбекистонинг барча ҳудудлари бўйича ёғингарчиликсиз об-ҳаво сақланиб туради.

Республиканинг айрим жойларига кечаси ва эрталаб туман тушиши мумкин. Шамол шарқдан 7-12 метр/секунд тезликда эсади.

Ҳаво ҳароратининг аста-секин кўтарилиши давом этади. Ҳафтанинг биринчи ярмида кечалари бир оз совуқ бўлиши сақланиб туради, кундуз кунлари эса ҳаво ҳарорати 8-11 даража илиқ атрофида бўлади. Чоршанба ва пайшанби кунлари кечалари 0-3 даража илиқ, кундуз кунлари 12-15 даража илиқ бўлиши кутилмоқда. Шимолда ҳарорат асосан кечалари 0-5 даража совуқ, кундуз кунлари 4-9 илиқ бўлади.

Тошкентда 3—7 февраль кунлари ёғингарчилик кутилмайди. Ҳарорат 3—4 февралда кечалари 0-2 даража совуқ, кундуз кунлари 8-10 даража илиқ бўлади. Ҳарорат 5—7 февралда кечалари 1-3 даража илиққача, кундуз кунлари 12-15 даража илиққача аста-секин кўтарилади.