Трамп Путин Украинадан фақат ҳудуд эмас, бутун мамлакатни истайди, деб ҳисоблайди

Бу ҳақда Оқ уй аппарати раҳбари Сьюзи Уайлс Vanity Fair журналига берган интервьюсида маълум қилди.

Унинг сўзларига кўра, Дональд Трамп Путин Украинадан бирор қисмини эмас, балки бутун давлатни қўлга киритишни кўзлаётганига ишонади. Уайлс Трампни ўзини ҳеч нарса билан чекламайдиган, истаган нарсасига эришишга ишонадиган шахс сифатида тасвирлаган.

Айтилишича, Трамп Капитолий штурмида иштирок этган энг кескин иштирокчиларни афв этмаслик ҳақидаги маслаҳатларни инобатга олмаган. Шунингдек, сиёсий рақибларидан қасос олиш имконияти пайдо бўлса, ундан фойдаланишдан тортинмаслиги таъкидланган.

Уайлс Трампни “алкоголик шахсият”га эга — кескин, импульсив ва доимий низоларга мойил инсон сифатида таърифлаган. Унинг фикрича, Жей Ди Вэнс Трампни ғоявий сабабларга кўра эмас, балки сиёсий карьераси учун қўллаб-қувватлаган. Вэнс, шунингдек, фитна назариялари тарафдори сифатида тилга олинган.

Илон Маск ҳақида эса Уайлс уни ғалати ва иррационал инсон, кетамин моддасини фаол истеъмол қилувчи деб атаган. Унинг айтишича, миллиардер шов-шувли твитлар қолдираётган пайтларда “микродоза” қабул қилади.

Шу билан бирга, Уайлс USAID’ни ҳимоя қилган ва Эпштейнга оид ҳужжатларни ўқиганини тасдиқлаб, уларда Трамп исми ҳақиқатдан ҳам учрашини айтган.

Бироқ интервью эълон қилинганидан сўнг, Сьюзи Уайлс журнал унинг сўзларини контекстдан узиб олгани ва маъмурият фаолиятини атайлаб салбий тусда кўрсатганини билдирган.

Маълумот учун, 68 ёшли Сьюзи Уайлс Трампнинг 2024 йилги сайлов кампаниясида асосий шахслардан бири бўлган ва Оқ уй аппарати раҳбари лавозимини эгаллаган илк аёл ҳисобланади. Журналист унга тахминан бир йил давомида мурожаат қилган.