Ўзбекистон делегацияси Танзанияда бўлиб ўтадиган Парламентлараро Иттифоқ Ассамблеясининг навбатдаги сессиясида иштирок этади

Ўзбекистон Олий Мажлиси Сенати раиси Танзила Нарбаева бошчилигидаги делегация 5–9 октябрь кунлари Аруша шаҳрида бўлиб ўтадиган Парламентлараро Иттифоқ Ассамблеясининг 153-сессиясида иштирок этиш учун Танзанияга ташриф буюради.

Ўзбекистоннинг нуфузли делегацияси таркибидан сенаторлар, Олий Мажлис Қонунчилик палатаси депутатлари ўрин олади.

Сессиянинг асосий мавзуси инклюзивлик, ишонч ва тенг имкониятлар орқали яхши бошқарувни мустаҳкамлаш ва жамоаларнинг имкониятларини кенгайтириш бўлиши режалаштирилмоқда. Шунингдек, ушбу сессия доирасида Парламентлараро Иттифоқнинг янги президенти уч йиллик муддатга сайланади.

Эслатиб ўтамиз, 2026 йил апрель ойида Олий Мажлис Сенати раиси Танзила Нарбаева бошчилигидаги делегация Истанбул шаҳрида бўлиб ўтган Парламентлараро иттифоқ Ассамблеясининг 152-сессиясида иштирок этган эди.