Украинада ҳеч қандай сулҳ йўқ, аммо “умидли иқтисодий лойиҳалар” бўйича “ўзаро қизиқиш” бор: Трамп ва Путин телефон орқали нима ҳақида гаплашишди?

Кеча кундузи АҚШ ва Россия президентлари Дональд Трамп ва Владимир Путин жорий йилда олтинчи марта телефон орқали суҳбатлашишди. Бу суҳбат кутилмаган ҳолда бўлиб ўтди, чунки олдиндан ҳеч қандай баёнотлар берилмаган эди.

Асосий мавзу — Украинадаги уруш бўлди. Россия президенти маслаҳатчиси Юрий Ушаковнинг сўзларига кўра, Путин ўз позициясини очиқ баён этган:

"Бизнинг президентимиз Россия ўз олдига қўйилган мақсадларга эришишини маълум қилди, яъни ҳозирги вазиятга олиб келган сабабларни бартараф этиш. Россия бу мақсадлардан воз кечмайди"

Бу, аслида, сўнгги ҳафталарда янада кучайган Украинага қарши ҳужумлар тўхтамаслигини англатади. Шу билан бирга, Ушаковга кўра, Путин музокараларга очиқ эканлигини ҳам билдирган. Унинг сўзларига кўра, суҳбат “самимий” бўлган:

"У, шунингдек, Россия томони музокара жараёнини давом эттиришга тайёр эканлигини айтди."

Аввалроқ Истанбулда Россия ва Украина ўртасида икки марта тўғридан-тўғри музокаралар бўлиб ўтган, лекин улар тўхташ ёки сулҳ борасида аниқ натижа бермаган.

Россия томонининг талаблари ўша-ўша: Украина НАТОга киришдан воз кечиши, Қрим ва яна тўртта оккупация қилинган ҳудудни Россияга бериши. Украина президенти Владимир Зеленский учун бу шартлар мутлақо қабул қилиб бўлмайди.

Москва версиясига кўра, суҳбатда Яқин Шарқдаги вазият, жумладан, июн ойидаги Исроил ва Эрон ўртасидаги уруш ҳам муҳокама қилинган. Ушаковнинг таъкидлашича, Путин бу можарони сиёсий ва дипломатик йўл билан ҳал этиш тарафдори эканлигини билдирган.

Бундан ташқари, Трамп ва Путин бир қатор “юмидли иқтисодий лойиҳаларни”, айниқса энергетика ва космик тадқиқотлар соҳасида, амалга ошириш бўйича “ўзаро қизиқиш”ни тасдиқлашган.

Дональд Трамп эса телефон суҳбатидан сўнг шундай деган:

“Мен Украинада давом этаётган урушдан хурсанд эмасман ва Путин билан бу борада ҳеч қандай ютуққа эришмадим.”
“Йўқ, мен у билан ҳеч қандай ютуққа эришмадим”, — деб жавоб берган Трамп журналистнинг саволига.