Россияда мактабга ҳужум қилиб, тожикистонлик болани ўлдирган ўсмир ҳибсга олинди

Бу ҳақда “ТАСС” хабар бермоқда.

Москва суди Горки-2 посёлкасида жойлашган мактабга пичоқ билан ҳужум қилиб, одам ўлдиришда айбланаётган 15 ёшли Тимофей K.ни ҳибсга олиш тўғрисида қарор чиқарди, дея хабар бермоқда агентлик.

Ҳужум 16 декабр куни Москва вилоятининг Горки-2 посёлкасидаги мактабда рўй берганди. Шу мактабнинг тўққизинчи синфи ўқувчиси бўлган 15 ёшли Тимофей мактабга пичоқ кўтариб келиб, қўриқчи ва ўқувчиларга ҳужум қилган. Натижада тўртинчи синф ўқувчиси Қобилжон Алиев ҳалок бўлган.

Ҳужумдан олдин Тимофей К. мактабдаги болалардан қайси миллатдан эканини сўраган. Бу унинг ўзи томонидан олинган ва Telegram-каналига жойлаштирган видеосида акс этган. У ўқитувчиси билан турган бошланғич синф ўқувчилари гуруҳи олдига келган ва уларнинг миллатини сўраган, шу вақтда ортдан яқинлашган қўриқчи уни чақирган, у ўгирилиб қўриқчининг юзига баллондаги суюқликни сепган ва елкасига пичоқ урган, кейин эса ҳар томонга қочаётган ўқувчилардан бирига етиб олиб, танасининг турли қисмларига устма-уст зарба берган ва уни ўлдирган. Шундан сўнг Тимофей ўз қурбони фонида селфи олган.

Тимофей оммавий қотилликлар ва нацистик ғояларга ишора қилувчи жумлалар ёзилган эпикировкада бўлган. Хусусан, унинг нимчасида “No Lives Matter” (“Ҳеч кимнинг ҳаёти муҳим эмас”) ёзуви туширилганди. Бу оммавий қотилликлар ижрочилари ҳамда ўта ўнгчи гуруҳларга тақлид қилишга асосланган субмаданият белгисидир