Украина дунёдаги энг йирик қурол импортчисига айланди - SIPRI институти

Стокголм халқаро тинчлик тадқиқот институти (SIPRI) янги ҳисоботига кўра, Украина сўнгги йилларда дунёдаги энг йирик қурол импортчисига айланди.

Тадқиқотга кўра, сўнгги беш йил ичида Украинага қурол етказиб бериш ҳажми аввалги шу даврга нисбатан қарийб 100 баробарга ошган. Натижада, Украина оғир қуроллар, жумладан, танклар, қирувчи самолётлар ва сув ости кемалари импорти бўйича жаҳон бозорининг 8,8 фоизини эгаллайди.

Украинадан кейин энг йирик қурол импорт қилувчи давлатлар рўйхатини Ҳиндистон (8,3%), Қатар (6,8%), Саудия Арабистони (6,8%) ва Покистон (4,6%) эгаллаган. Германия, импорт қилувчилар орасида атиги 33-ўринни эгаллаб турганига қарамай, дунёдаги бешинчи йирик қурол экспортчиси бўлиб қолмоқда.