Туркия Россиядан газ импортини оширишга тайёр

Туркия Россиядан газ импорти ҳажмини оширишга тайёр, бироқ уларнинг тижорат жозибадорлигини таъминлашни сўрайди.

Бу ҳақда Россия бош вазири ўринбосари Александр Новак Туркия делегацияси билан музокаралардан сўнг журналистларга маълум қилди.

"Туркия Россия газини харид қилишни кўпайтиришга тайёр. Улар кўпайтирмоқчи. Лекин улар тижорат жозибадорлиги масаласини кўтармоқда", - деди у.

Эслатиб ўтамиз, аввалроқ Россия 2025 йилнинг январ-апрел ойларида Туркияга қувур орқали газ етказиб беришни ўтган йилнинг шу даврига нисбатан 16,4 фоизга ошириб, 8,8 миллиард куб метрга етказгани хабар қилинганди.

2024 йил якунларига кўра, Россия Туркияга қувур орқали газ етказиб бериш ҳажмини 2,6 фоизга ошириб, 21 миллиард куб метрдан сал кўпроққа етказди.

Россия Туркияга Қора денгиз орқали икки қувур орқали газ етказиб беради. Блуе Стреам 2003 йил бошида фойдаланишга топширилган бўлиб, унинг лойиҳавий қуввати йилига 16 миллиард куб метрни ташкил қилади. “Турк оқими” газ қувури иккита линиядан иборат бўлиб, улардан бири турк истеъмолчиларини газ билан таъминлаш, иккинчиси – Жанубий ва Жануби-Шарқий Европа мамлакатларига газ етказиб бериш учун мўлжалланган. “Турк оқими”нинг умумий қуввати 31,5 миллиард куб метрни ташкил этади, унинг фаолияти 2020 йилнинг январь ойида бошланган.