Трампнинг Украина бўйича махсус вакили Кит Келлог урушни тугатиш бўйича музокараларда иштирок этишдан четлаштирилди — Politico

Нашрнинг ёзишича, ҳозир музокаралар жараёнида АҚШ томонидан асосий ролларни давлат котиби Марко Рубио ва Яқин Шарқ бўйича махсус вакил Стив Уиткофф бажармоқда. Келлог феврал ва март ойларида Саудия Арабистонида бўлиб ўтган учрашувларда қатнашмаган. АҚШ расмийлари бу учрашувларда Россия ва Украина делегациялари билан музокаралар олиб борган. Феврал ойида Келлог Киевга ташриф буюрган эди.

Трамп маъмурияти вакилининг NatSec Daily нашрига маълум қилишича, Келлогнинг Украина бўйича музокаралардаги роли "катта савол остида", аммо президент бу борада ҳали якуний қарорни қабул қилмаган. Шу билан бирга, маъмуриятнинг бошқа амалдорлари бу фикрга қўшилмай, Келлогни "жамоанинг қимматли аъзоси" деб аташмоқда.

Politico билан суҳбатлашган манбалар Келлогнинг музокараларда иштирок этмаётганини АҚШ маъмуриятининг Украинага кўрсатилаётган ёрдамни давом эттиришга шубҳа билан қараётган қисми таъсирининг кучайиши сифатида баҳоламоқда. Келлогга яқин манбага кўра, махсус элчи Трамп билан тўғридан-тўғри мулоқотни давом эттирмоқда. Унинг ўзи эса Уиткофф билан яқин ҳамкорлик қилаётганини таъкидлаган.