«Тетрис» яратувчилари Оқ уйни ўйиндан рухсатсиз фойдаланганликда айблади

The Tetris Company компанияси Оқ уй томонидан «Тетрис» услубида яратилган онлайн ўйинлардан бирига алоқадор эмаслигини маълум қилди ва ўз интеллектуал мулкидан фойдаланишга рухсат бермаганини билдирди.

«Build the Wall» («Девор қур») деб номланган ўйин фойдаланувчиларга АҚШ ва Мексика чегарасида тўсиқ қуришни таклиф қилади. Оқ уй тавсифига кўра, ўйиннинг мақсади «чегарани яқинлашаётган тўдадан ҳимоя қилиш».

«The Tetris Company уни ишлаб чиқишда иштирок этмаган. Биз Tetris’да одамларни ажратиш эмас, балки бирлаштириш кучига ишонамиз», — дейилади компания баёнотида.

Компания «Tetris» бренди ва унинг интеллектуал мулкидан фойдаланиш учун ҳеч қандай лицензия бермаганини ҳам таъкидлаган.

Оқ уй Дональд Трамп сиёсати билан боғлиқ жами бешта ретро услубдаги ўйинни бир вақтда эълон қилди. Улардан бири «Snake» ўйини услубида яратилган бўлиб, унда ўйинчи чегара сиёсати бўйича раҳбар Том Хомэннинг рақамли қиёфасини бошқаради ва Рио-Гранде дарёсини кесиб ўтаётган мигрантларни ушлаши керак.