Сунъий интеллект тарихдаги энг хавфли технология

Билл Гейтс сунъий интеллектни тарихдаги энг хавфли технология деб атади.

Microsoft компанияси ҳаммуассиси Билл Гейтс сунъий интеллектни «инсоният томонидан яратилган энг хавфли технология» деб атади. У CNN телеканалига берган интервьюсида сунъий интеллект автомобиллар, самолётлар ёки гиёҳванд моддалардан ҳам каттароқ хавф туғдиришини таъкидлаб, АҚШ ҳукуматини унинг ривожланиши устидан назоратни кучайтиришга чақирди.

Гейтснинг фикрича, сунъий интеллектни тартибга солишни фақат технологик компаниялар ихтиёрига топшириб қўйиш мумкин эмас.

«Жамиятдаги ягона назорат механизми сунъий интеллектни ишлаб чиқувчи компанияларнинг ўзигина бўлиб қолмаслиги керак», — деди тадбиркор.

Аввалроқ, NBC телеканалига берган интервьюсида ҳам Гейтс сунъий интеллектнинг ривожланиши фалокатли оқибатларга олиб келиши мумкинлигидан огоҳлантирган эди.

«Сунъий интеллект, шубҳасиз, бир миллиард инсоннинг ўлимига сабаб бўлиши мумкин бўлган воқеаларни келтириб чиқариш учун етарлича кучли», — деган у.

Унинг фикрича, янги технологиялар келаси йилнинг ўзида хакерлик ҳужумлари сонининг бир неча баробар ошишига олиб келиши мумкин.

Гейтс энди сунъий интеллект хавфсизлиги масаласини АҚШ президенти Дональд Трамп ва унинг маъмурияти билан муҳокама қилишни режалаштирмоқда.