У «ўз халқи ва Украинадаги одамларнинг жаллоди»

Республикачилар Трампнинг Россия билан дизель ёқилғиси бўйича келишувига қарши чиқди.

АҚШ президенти Дональд Трампнинг Россияга дизель ёқилғисини етказиб беришга рухсат бериш тўғрисидаги қарори ҳатто унинг партиядошлари орасида ҳам танқидга сабаб бўлди. АҚШ раҳбари Москва дастлаб 300 минг тонна, кейинчалик эса 4,8 миллион тоннагача дизель ёқилғисини АҚШга сотиши учун санкцияларни юмшатишга рози бўлди. Бу чора Конгрессга бўлиб ўтадиган оралиқ сайловлар арафасида ёқилғи нархларини пасайтиришга ёрдам бериши кутилмоқда.

Республикачилар партиясидан сенатор Жон Кеннеди Россия дизелини сотиб олишга қатъиян қарши чиқди. У Владимир Путинни «ўз халқи ва Украинадаги одамларнинг жаллоди» деб атади.

АҚШ Вакиллар палатаси Ташқи ишлар қўмитасининг собиқ раиси Майкл Маккол эса нефтга қарши санкцияларни юмшатиш Россиянинг ҳарбий машинасини молиялаштиришга имкон беришидан огоҳлантирди.

Республикачилар партиясидан конгрессмен Брайан Фицпатрик Оқ уйнинг Россияга қарши санкцияларни бекор қилишига тўсқинлик қиладиган қонун лойиҳаси бўйича овоз беришга эришмоқчи.

Шунингдек, у Украина президенти Владимир Зеленскийни очиқ қўллаб-қувватлаб, у «АҚШ Конгресси, халқимиз ва украиналикларнинг мутлақ қўллаб-қувватлашига эга» эканини таъкидлади.

Аввалроқ Трамп Москва билан тузилган келишувдан норози бўлган Зеленскийни танқид қилиб, Украина вақти келиб янги президент топиши кераклигини айтган эди.