Шавкат Мирзиёев DOST миллий автомобиль бренди лойиҳаси билан танишди

ADM Global Ўзбекистон Республикаси Президенти Шавкат Мирзиёевга DOST бренди остидаги биринчи миллий автомобиль лойиҳасини тақдим этди. «Янги Ўзбекистон» университетига ташриф доирасида давлат раҳбари ADM техник лабораториясида бўлди, у ерда талабалар ADM Jizzakh автомобиль заводи муҳандислари билан биргаликда автомобилни ишлаб чиқишда иштирок этмоқда.

Миллий автомобиль брендини яратиш - Ўзбекистон автомобилсозлик саноатини ва ўз муҳандислик компетенцияларини ривожлантириш йўлидаги навбатдаги қадамдир. Бу билан ташқи чекловларга қарамлиги камаяди, ўз техник ечимларини жорий этиш имкониятлари кенгаяди ва маҳсулотни ривожлантиришда кўпроқ мустақилликка эга бўлади.

ADM Jizzakh - Ўзбекистондаги биринчи хусусий мультибренд автомобиль заводи. Халқаро брендлар автомобилларини ишлаб чиқариш тажрибаси ва мавжуд ишлаб чиқариш базаси ўз бренди остида автомобилларни яратиш ва кейинчалик ишлаб чиқариш учун тўпланган билимлардан фойдаланиш имконини беради.

Ҳозирги вақтда ADM келажакдаги автомобиль концепциясини ишлаб чиқмоқда ва ишлаб чиқариш майдончасини тайёрламоқда. Компания DOSTнинг биринчи прототипини келаси йил бошида намойиш этишни режалаштирган.

Биринчи босқичда DOST енгил тижорат транспорти сегментида тақдим этилади. Бу миллий брендга бўлган талабни баҳолаш, маҳсулот ва маркетингга оид ечимларни синаб кўриш ҳамда кейинги босқич – енгил автомобиль яратишга тайёргарлик кўриш имконини беради.

Лойиҳанинг алоҳида йўналиши – муҳандислик малакаларини ривожлантиришдан иборат. ADM Global Ўзбекистон автомобилсозлик саноати учун кадрлар тайёрлашга тизимли равишда сармоя киритмоқда. Холдинг кўмагида «Янги Ўзбекистон» университети негизида таълим, илмий-тадқиқот (R&D) ва ишлаб чиқаришни бирлаштирган муҳандислик экотизими шакллантирилмоқда.

Таълим модели дунёнинг етакчи автомобиль ишлаб чиқарувчилари стандартларини ҳисобга олган ҳолда яратилган бўлиб, фундаментал тайёргарликни реал муҳандислик вазифалари устида ишлаш билан уйғунлаштиради. Талабалар ўз билимларини амалда қўллаш ва ADM муҳандислари билан биргаликда миллий автомобилни ишлаб чиқишда иштирок этиш имкониятига эга бўладилар.