Россия 2027 йилда рекорд даражада ҳарбий харажат режалаштирмоқда

Россия 2027 йилда мудофаа харажатларини 17,1 триллион рублга етказишни режалаштирмоқда. Reuters ҳукумат ҳужжатларига таяниб хабар беришича, бу кўрсаткич дастлаб режалаштирилган маблағдан 27 фоизга кўп.

Келгуси уч йилда Россия мудофаа соҳасига жами қарийб 50 триллион рубль сарфлаши кутилмоқда. Бу харажатлар мамлакатда бюджет тақчиллиги ортиб бораётган бир пайтга тўғри келмоқда.

2026 йил якуни бўйича Россия бюджет тақчиллиги аввал режалаштирилган ЯИМнинг 1,6 фоизи ўрнига 3,2 фоиз бўлиши кутилмоқда. Харажатларни қоплаш учун ҳукумат солиқларни ошириш ва кўпроқ қарз олишни режалаштирган.

Хусусан, 2027 йилдан металлургия ва тоғ-кон компанияларига қўшимча солиқ жорий этилиши режалаштирилмоқда. Ушбу солиқ бюджетга йилига тахминан 200 миллиард рубль олиб келиши кутилмоқда.

Шу билан бирга, Украина президенти Владимир Зеленский Россияда қўшимча сафарбарлик бошланганини билдирди. Унинг айтишича, Россия турли усуллар орқали армияга жалб қилинаётганлар сонини оширмоқда ва хорижликларни жалб қилишни ҳам кенгайтиришни режалаштирмоқда.

Зеленский маълумотларига кўра, ҳозир Россия ҳудудида 8 мингдан ортиқ Шимолий Корея ҳарбий хизматчиси бор ва яна 10 минг нафарни юбориш режалаштирилмоқда. Бу маълумотлар Украина томонининг баёноти бўлиб, мустақил равишда тасдиқлангани кўрсатилмаган.