Польшада мактабларга ҳужумларнинг олдини олиш чоралари доирасида 13 ёшдан 19 ёшгача бўлган 117 нафар ёш ҳибсга олинди. Бу ҳақда мамлакат бош вазири Дональд Туск маълум қилди.

Унинг сўзларига кўра, ҳибсга олинганлар жазога сабаб бўлиши мумкин бўлган таҳдидлар билдирган ёки хавфли буюмларни сақлаган. Уларнинг хатти-ҳаракатлари хавотир уйғотган.

Польша ички ишлар ва маъмурият вазири Марцин Кервиньский ҳибсга олинганларга оид ишлар прокуратура ёки оилавий судларга юборилаётганини айтди.

Хавфсизликни таъминлаш мақсадида мактаблар атрофида қарийб 10 минг нафар полиция ходими хизмат қилмоқда. Душанба кунидан бошлаб уларнинг сонини 20 минг нафарга етказиш режалаштирилган.

Бу чоралар мамлакатда содир бўлган бир қатор ҳужумлар фонида кўрилмоқда. 10 октябрь куни Варшавадаги мактаб яқинида 21 ёшли аёл уч нафар йигитга ҳужум қилган. Ҳодиса оқибатида уч киши жароҳатланган.

Бундан аввал эса иккита мактабда ўсмирлар содир этган ҳужумлар оқибатида бир киши ҳалок бўлган, ўндан ортиқ киши жароҳатланган.