Фицо: АҚШ ва Россия ўртасидаги ёқилғи келишуви ЕИ раҳбариятининг соддалигини кўрсатди

Словакия бош вазири Роберт Фицонинг таъкидлашича, АҚШ ва Россия ўртасида дизель ёқилғиси етказиб бериш бўйича эришилган келишув Европа Иттифоқи сиёсий раҳбариятининг соддалигини кўрсатади. Унинг фикрича, ЕИ ўзининг Россияга нисбатан адоватга асосланган сиёсати учун қиммат дизель ёқилғиси ва эҳтимолий тақчиллик билан «мукофотланади».

Аввалроқ АҚШ президенти Дональд Трамп Россия президенти Владимир Путин билан бўлиб ўтган суҳбат давомида Россиядан АҚШга дизель ёқилғиси етказиб бериш бўйича келишувга эришилганини маълум қилган эди.

«Владимир Путин ва Дональд Трампнинг Россия дизель ёқилғисини АҚШга етказиб бериш бўйича келишуви Европа Иттифоқи сиёсий раҳбариятининг нақадар содда фикрлашини кўрсатади. АҚШ арзонроқ дизель ёқилғисига эга бўлади, Россия эса ўз бюджетига даромад олади. Биз эса Европа Иттифоқида адоватга асосланган ҳарбий сиёсатимиз, санкцияларимиз ва ахлоқ борасидаги насиҳатларимиз учун литри уч евро турадиган дизель ёқилғисига, эҳтимол, унинг тақчиллигига ҳам дуч келамиз», — деб ёзди Фицо ўзининг Facebook ижтимоий тармоғидаги саҳифасида.

Унинг таъкидлашича, мазкур келишув Словакиянинг ташқи сиёсати тўғри эканини ҳам тасдиқлайди. Бу сиёсат дунёнинг барча йўналишлари билан ҳамкорлик қилиш ва республика манфаатларини ҳимоя қилишга қаратилган.