Пеленинг ЖЧ-1958 финалидаги футболкаси аукционга қўйилади

Уч карра жаҳон чемпиони Пеле "Жаҳон чемпионати-1958" финалида кийган футболка "Sotheby’s" аукционида сотувга қўйилади.

1958 йилги мундиал финалида Бразилия Швецияни 5:2 ҳисобида мағлуб этган эди. Ўша пайтда 17 ёшли Пеле дубль қайд этиб, ҳозиргача Жаҳон чемпионати финалида гол урган энг ёш футболчи бўлиб қолмоқда.

"The New York Times" маълумотига кўра, футболканинг бошланғич баҳоси 6 миллион доллардан юқори бўлади.

Савдолар 29 июнь куни бошланиб, 16 июль куни — "ЖЧ-2026: финалидан уч кун олдин якунланади.

Ушбу лот футбол тарихидаги энг қиммат футболка рекордини янгилаши мумкин. Аввалги рекорд Диего Марадонанинг "ЖЧ-1986:да кийган футболкасига тегишли бўлиб, у 2022 йилда 9,28 миллион долларга сотилган эди.