Орзуга айб йўқ: Трамп қаерларни АҚШга қўшмоқчи?

Трамп Канада, Мексика, Исландия, Гренландия, Куба ва Панамани АҚШга қўшишни орзу қилмоқда.

Дональд Трамп яна бир бор АҚШга қўшиб олинган қўшни давлатлар тасвирланган географик харитани намойиш қилди. Бу сафар АҚШ президенти ўз амбицияларини янада кенгайтириб, Канада, Мексика, шунингдек, Марказий Америка ва Кариб ҳавзаси мамлакатларини ҳам «қўшиб олди». Расм устига катта ҳарфлар билан «United States of America!» деб ёзилган. Данияга қарашли Гренландия ҳам юлдузлар ва йўл-йўл чизиқлар билан безатилган. Бу сафар харитада Исландия ҳам АҚШ таркибида кўрсатилган.

Кўринишидан, республикачи Трамп яна дунёнинг ярмини «тролл» қилмоқда. Унинг тарафдорлари орасида анча машҳур бўлган «Буюк Америка» хариталари қўшни давлатларда, айниқса Канадада норозилик уйғотди. Трамп аввалроқ Канадани «АҚШнинг 51-штати», унинг бош вазирини эса «губернатор» деб атаган эди.

Гренландия ва Копенгагенда ҳам норозилик билдирилди. Дания бош вазири Метте Фредериксен яна бир бор гренландияликлар АҚШ таркибига қўшилишни истамаслигини таъкидлади.

Исландияликлар ҳам харитага ҳайрат ва норозилик билан муносабат билдирди. Исландия ташқи ишлар вазири Торгердюр Гуннарсдоттир АҚШнинг Исландиядаги элчиси Билли Лонгни Ташқи ишлар вазирлигига чақирди. Рейкьявикда харита «мутлақо номақбул» экани таъкидланди.

Сўнгги вақтларда Трампнинг хариталар орқали «троллинг»и географик номларни ўзгартириш билан ҳам боғлиқ бўлмоқда. Онтарио кўли «Америка кўли» деб қайта номланганидан сўнг у АҚШнинг Нью-Мексико штати «Нью-Америка»га айлантирилган хариталарни ҳам эълон қилди. Трамп бу ғояни «нуфузли ва ажойиб» деб атади.

АҚШ президенти нефть савдоси учун стратегик аҳамиятга эга бўлган Ҳурмуз бўғозини ҳам «Трамп бўғози» деб қайта номлашни таклиф қилди. Шундан сўнг у бўғозни АҚШ ҳудуди деб эълон қилиш ғоясини ҳам илгари сурди.