Нетаньяхунинг ўғли Оксфордда яширинча квартира сотиб олгани фош бўлди

Исроил бош вазири Биньямин Нетаньяҳунинг ўғли Авнер 2022 йили Буюк Британиядаги иқтисодий инқироздан сўнг фунт стерлинг курси пасайишидан фойдаланиб, Оксфорд шаҳрида £502,500 ($680,000) га квартира сотиб олган. Бу ҳақда Calcalist нашри хабар берди.

Харид "Ави Авнер Сегал" номи остида амалга оширилган. Бу тахаллус Авнернинг бувиси қизлик фамилиясидан олинган бўлиб, хавфсизлик сабабли шундай қилганини маълум қилган.

• Квартирани харид қилишда ипотека олинмаган, пулни эса ота-онаси бергани айтилган.

• Харид суммаси 1.98 млн шекелни ташкил қилган — бу Исроилда хорижий мулкни солиқ идорасига мажбурий декларация қилиш талаб қилинадиган 2 млн шекел чегарасидан паст.

Агар битим 10 кун эрта ёки кеч бўлиб ўтганида, валюта курсларига кўра сумма 2 млн шекелдан ошиб кетган бўлар эди ва Авнер расман декларация тақдим этиши шарт бўларди.

2022 йили Нетаньяҳу ҳали мухолифат етакчиси эди ва унинг ўғлини хорижда Шин-Бет томонидан қўриқлаш бўйича сўрови рад этилган.

2019 йил ноябрида Исроил Бош прокурори Авихай Мандельблит Нетаньяҳуга нисбатан коррупция, ишончни суистеъмол қилиш ва мансаб ваколатини шахсий мақсадда қўллаш моддалари билан айблов эълон қилган. Суд жараёнлари 2020 йил май ойида бошланган.

Нетаньяҳу “1000”, “2000” ва “4000” деб номланган учта жиноят иши бўйича тергов остида. Уни бой бизнесменлардан совғалар қабул қилиш ва оммавий ахборот воситаларидан ижобий ёритиш эвазига бизнесларга имтиёзлар беришда айблашмоқда.