Путинга қарши чиқишга журъат қилган ягона амалдор

Россия Украинага қарши уруш бошлаган 2022 йилнинг феврал ойида президент Владимир Путиннинг босқин режасини Кремлдаги барча мансабдорлар ҳам бир овоздан қўллаб-қувватламаган. The New York Times газетаси суриштирувлари ана шундан далолат беради.

Нашрнинг ёзишича, Россия президенти администрацияси раҳбарининг ўринбосари Дмитрий Козак урушнинг илк кунларида Путиннинг Украинадан таслим бўлишни талаб қилишга оид буйруғини бажаришдан бош тортган. Бунинг учун қамоқ ёки отув жазосига тайёр эканини айтган.

The New York Times манбаларига кўра, Дмитрий Козак Украинага босқин арафасида Путин учун урушнинг салбий оқибатлари ҳақида махсус маълумотнома тақдим этган. Унда Украинага ҳужум Швеция ва Финляндияни НАТОга аъзоликка мажбур қилиши ҳам қайд этилган. Бу тахмин кейинчалик ўз тасдиғини топди.

2022 йил 21 феврал куни, яъни уруш бошланишидан уч кун аввал Россия Федерацияси Хавфсизлик кенгашининг ёпиқ мажлисида ҳам Козак Украина рус ҳарбийларига қатъий қаршилик кўрсатиши, уруш ортидан жорий этиладиган санкциялар мамлакатни номақбул геосиёсий ҳолатга келтиришидан огоҳлантирган.

АҚШ нашри ёзишича, уруш бошланганидан кейин Дмитрий Козак Украина президенти девони раҳбари Андрей Ермак билан телефон орқали суҳбатда зиддиятни музокара йўли билан ҳал этишини айтган.

2022 йил 25 феврал куни Путин Козак билан мулоқотда уни кескин танқид қилган ва аъёнидан Киев ҳукуматини тўла-тўкис таслим бўлишга кўндиришни талаб қилган. Ўша паллада Козак давлат раҳбари буйруғини бажаришдан бош тортган ва бу қарори учун жазога тайёр эканини билдирган.

Пировардида президент девони раҳбарининг муовини Дмитрий Козак Украинага таслим бўлиш талабини илгари суришга рози бўлган ва Кремл талабини Киев ҳукуматига етказган. Аммо Киев бу талабни рад этган.

Бир неча кун ўтиб Дмитрий Козак Украина билан музокарадан четлатилган ва бу вазифа Владимир Мединскийга топширилган.

Путин билан тўғридан-тўғри зиддиятга қарамай, Козак президент администрацияси раҳбарининг ўринбосари лавозимида ишлашда давом этган.

The New York Times газетасига кўра, бир муддат кейин Путин Козакка Россияда иқтисодий иқлимни яхшилаш бўйича таклиф ҳозирлашни топширган. Мамлакатда либераллашувга қаратилган ислоҳотларни таклиф қилган амалдор Украина билан урушни тўхтатиш ва музокара ўтказишни яна бир карра эслатган.

Козак жорий йил 18 сентябр куни Россия президенти администрацияси раҳбарининг ўринбосари лавозимидан бўшатилди.

Журналистлар 67 ёшли Дмитрий Козакни Путин теграсидаги юқори мартабали амалдорлар орасида урушга қарши эканини президентга очиқ айтган ягона мансабдор деб атамоқда. Ғарб матбуоти Козакнинг урушга қарши позициясини Путиннинг темир қобиғида ҳосил бўлган дарз деб баҳоламоқда.

Дмитрий Козак Путиннинг яқин амалдорлари сирасига киради. У ўн йиллар мобайнида Путин жамоасида фаолият юритган. Жумладан, Россия минтақавий тараққиёт вазири, Россия президентининг Жанубий федерал округдаги махсус вакили каби лавозимларда ишлаган.

Ёпиқ мажлислардаги эътирозларга қарамай, Козак Украина урушини ошкора равишда, ОАВ орқали қораламаган. У The New York Timesнинг интервю бериш сўровини ҳам рад этган. Ушбу жиҳат ҳамда Путин билан кўп йиллик қадрдонлик унга нисбатан жазо қўлланмаганини изоҳлайди.

Манбаларга кўра, у ҳозир ҳам Москада яшайди, аммо даволаниш учун Исроил, шунингдек, Туркия ва БАА каби давлатларга эмин-эркин бориб келмоқда.

Дмитрий Козак РФ президенти администрацияси раҳбарининг ўринбосари сифатида Ўзбекистонга ҳам ташриф буюргани маълум.