Нетаньяху сиёсатдан кета оладими?

Исроиллик телеканал C14 томонидан тарқатилган хабарга кўра, мамлакат Президенти Ицхак Герцог Бош вазир Биньямин Нетаньяхуга сиёсий битим таклиф қилган. Ушбу режага мувофиқ, Нетаньяху ҳукумат тепасида яна икки йил ротация асосида раҳбарлик қилиши, шундан сўнг сиёсатдан бутунлай кетиши эвазига коррупция иши бўйича тўлиқ авф этилиши кўзда тутилган.

Телеканал маълумотларига кўра, Герцог бу каби вариантни қарийб икки йилдан бери илгари суриб келади. Нашр ушбу эҳтимолий битимни президентнинг сиёсий кучларни музокаралар бошлаш ва муроса излашга қилган чақириқлари билан боғламоқда.

Хабарда айтилишича, Нетаньяху яқин икки йил ичида АҚШ Президенти Дональд Трамп билан ўзаро ҳамкорлик қилиш мақсадида биринчи бўлиб Бош вазир лавозимини эгаллашни талаб қилиши мумкин. Шу билан бирга, ҳукуматни шакллантиришнинг кейинги сценарийлари сайловларнинг якуний натижалари ва қўшимча бюллетенлар ҳисоб-китобига боғлиқ бўлади.

C14 бошқа муқобил вариантлар сифатида мухолиф сиёсий лагердан депутатларни жалб қилиш, «Бирлашган рўйхат» қўллаб-қувватлови билан озчилик ҳукуматини тузиш ёки қайта сайловлар ўтказишни тилга олган.

Исроил Президенти канцелярияси ушбу нашр этилган маълумотни кескин рад этиб, уни «тўлиқ уйдирма» (fake news) деб атади ва бундай таклиф умуман мавжуд бўлмаганини билдирди. Канцелярия, шунингдек, ҳукуматни шакллантиришни топшириш процедураси бўйича ҳозирча ҳеч қандай муҳокамалар олиб борилмаётганини таъкидлади. Сайловларнинг расмий натижалари келаси чоршанба куни президентга тақдим этилади, шундан сўнг у парламент фракциялари билан маслаҳатлашувлар ўтказиб, ўз ваколатлари доирасида қарор қабул қилади.