Москвада 15-октябрдан курерлар учун мажбурий тестлар жорий этилади

Москва транспорт департаменти курерлар учун электрон тест синовларини йўлга қўйди. Бу ҳақда департаментнинг Телеграм-каналида хабар берилди.

Россия пойтахтида фаолият юритувчи етказиб бериш хизматлари ходимлари 30-сентябрдан бошлаб йўл ҳаракати қоидалари ва иш стандартларини билиш бўйича имтиҳон топширмоқда. Тестлар «АПТ» ахборот тизими орқали ўтказилмоқда.

Биринчи босқичда — 14-октябргача — тестлар ихтиёрий. Бироқ 15-октябрдан бошлаб хизматлар имтиҳондан ўтмаган курерларни буюртмаларга қўя олмайди.

Тест икки йўналишни қамраб олади:

• хавфсиз ҳаракатланиш қоидалари — тезлик меъёрлари, велосипед, скутер ва электросамокатларда ҳаракатланиш, пиёдалар ўтиш жойларида транспортдан тушиб ўтиш талаби;

• курерлар учун иш талаблари — ташқи кўриниш, сумка, транспорт воситаси, сменани бошлаш тартиби, етказиб бериш қоидалари ва хизмат кўрсатиш этикаси.

Тестдан ўтиш учун курер саволларнинг камида 80 фоизига тўғри жавоб бериши керак. Натижа курернинг шахсий кабинетида акс этади ва бир йил давомида амал қилади.

Москва транспорт департаменти раҳбари Максим Ликсутовнинг сўзларига кўра, тестдан ўтиш ҳар бир ходим йўл ҳаракати қоидаларини яхши билиши ва пиёдалар олдидаги масъулиятини тушунишини тасдиқлаш имконини беради.

Шунингдек, департамент Давлат автомобил инспексияси ва Москва автомобил-йўл институти билан биргаликда курерларнинг йўл ҳаракати қоидаларини бузишини аниқлашга қаратилган текширувлар ўтказмоқда.

Ликсутовнинг таъкидлашича, етказиб бериш хизматлари хавфсизлигини ошириш ишлари Москва мери Сергей Собяниннинг топшириғи асосида олиб борилмоқда.