Ёқилғи нархининг ўсишига энди асосий сабаб Ҳурмуз бўғози эмас...

АҚШ президенти Дональд Трамп мамлакатда бензин нархининг ошишини Украина томонидан Россия нефтьни қайта ишлаш заводларига уюштирилаётган зарбалар билан боғлади.

Трампнинг таъкидлашича, АҚШда ёқилғи нархининг ўсишига энди асосий сабаб Ҳурмуз бўғози эмас. Унинг фикрича, ушбу ҳудуд орқали нефть етказиб бериш ҳажмлари юқори даражада сақланиб қолаётган бир пайтда, Россия нефтьни қайта ишлаш заводларига қилинган ҳужумлар бозорга таъсир кўрсатмоқда.

«Бензин нархининг ошишига энди Ҳурмуз бўғози сабаб эмас. Деярли ҳар куни рекорд миқдорда нефть олиб чиқилмоқда. Сабаб — Россия нефтьни қайта ишлаш заводлари Украина томонидан ҳужумга учраётгани», — деб ёзди Трамп Truth Social тармоғида.

У, шунингдек, АҚШнинг айрим штатларида нефтьни қайта ишлаш заводларининг фаолияти тўхтатилиши ички бозордаги ёқилғи таъминотига таъсир қилаётганини билдирди.

АҚШ энергетика вазири Крис Райт аввалроқ мамлакатда дизель ёқилғиси танқислиги сақланиб қолаётганини айтган. У танқисликни, жумладан, Россиядан экспорт ҳажмларининг қисқариши, шунингдек, Яқин Шарқ ва Хитойдан етказиб беришдаги узилишлар билан боғлаган.

Маълумотларга кўра, АҚШда дизель ёқилғисининг ўртача нархи 6,43 долларгача пасайган. Бир ҳафта аввал эса кўрсаткич тарихий максимум — галлонига 6,52 долларга етган эди.

Аввалроқ Politico нашри Трамп маъмурияти ички бозорда энергия нархларини пасайтириш мақсадида дизель ёқилғиси экспортига 90 кунлик тақиқ жорий этиш режасини кўриб чиқаётганини хабар қилган.

Ҳурмуз бўғозидаги вазиятнинг кескинлашиши ҳам жаҳон энергетика бозорига таъсир кўрсатмоқда. Мазкур денгиз йўли нефть, нефть маҳсулотлари ва суюлтирилган табиий газни жаҳон бозорига етказиб беришда муҳим аҳамиятга эга.