Марсга инсон қадами етган кунларни кўриш Илонга насиб қилмаслиги мумкин

Америкалик миллиардер, SpaceX раҳбари Илон Маск Марс сайёрасини инсон томонидан ўзлаштириш қачон бошланиши бўйича ўз башоратини ўзгартирди.

«Энг яхши ҳолатда 20 йилдан сўнг, бироқ 30 йилга яқинроқ деганим тўғрироқ», — деб ёзди Маск X ижтимоий тармоғида.

Илон Маск ҳозир 53 ёшда, демак, вақти келиб унинг азалий орзуси рўёбга чиққанида у 73 ёки 83 ёшлар атрофида бўлади.

Маск 15 март куни берган баёнотида 2026 йилда Tesla компаниясининг Optimus роботи ортилган фазовий кема Марс томон парвоз қилишини айтганди. Ўшанда у агар парвоз муваффақиятли амалга ошса, 2029-2031 йилларда «қизил сайёра»га инсон қадами етиши мумкин, деганди. Эндиги башорати эса воқеалар ривожини анча ортга сурмоқда.

Маълумот учун: Ердан Марс томон парвоз қилиш имконияти ҳар 26 ойда бир марта пайдо бўлади (шунда икки сайёра ўртасидаги масофа минимум даражада қисқаради).