Ҳиндистон АҚШнинг Chevron компаниясидан Венесуэла нефтини сотиб олди

The Economic Times хабар беришича, Ҳиндистон 2023 йилдан бери биринчи марта АҚШнинг Chevron компанияси орқали Венесуэла нефтини харид қилди.

Маълум қилинишича, сотиб олинган Merey маркали нефть бир баррели учун келишилган нарх Brent crude эталон нефти нархидан тахминан 15 долларга паст бўлган.

Аввалроқ, Ҳиндистон компаниялари АҚШ билан эришилган келишув доирасида Россия нефтини сотиб олишни чеклагани ҳақида хабарлар тарқалган эди. Кейинчалик АҚШ президенти Donald Trump Россия нефти хариди сабаб жорий этилган 25 фоизлик божларни бекор қилгани айтилган.

Мутахассислар фикрича, арзон Венесуэла нефти хариди Ҳиндистоннинг энергия манбаларини диверсификация қилишга қаратилган сиёсати билан боғлиқ бўлиши мумкин.