Ўзбекистонликлар учун Қатарда ишлаш имконияти яратилди

Ўзбекистонлик фуқаролар учун Қатар давлатида меҳнат фаолиятини амалга ошириш мақсадида йирик вакансиялар базаси очилди.

Бу имконият Ташқи меҳнат миграцияси агентлиги ҳамда Қатарнинг «Jusour» рекрутинг компанияси ўртасида имзоланган ўзаро ҳамкорлик келишуви доирасида тақдим этилмоқда.

Ушбу янгилик ҳақида агентликнинг «Хорижда иш» расмий Telegram канали орқали маълумот берилди.

Белгиланган тартибга кўра, ишга қабул қилиш учун номзодларга аниқ талаблар қўйилган бўлиб, унга кўра талабгорлар 18 ёшдан 45 ёшгача бўлиши лозим.

Шунингдек, номзодлардан инглиз тилини камида А2 даражада билиши ёки IELTS 5 натижасига эга бўлиши талаб этилади. Араб тилини мукаммал биладиган фуқароларга эса саралаш жараёнларида қўшимча устунлик берилиши кўзда тутилган.

Ишга жойлашишнинг барча жараёнлари махсус «Tawzeef» платформаси орқали амалга оширилади.

Номзодлар ушбу сайтда эълон қилинган турли йўналишдаги вакансиялар билан танишиб чиқиб, ўзларига мос келадиган лавозимларга шахсий резюме (CV) юборишлари мумкин. Юборилган маълумотлар компания вакиллари томонидан кўриб чиқилиб, маъқул келган номзодлар билан электрон почта орқали алоқага чиқилади ва улар суҳбат жараёнига таклиф этилади.

Саралашнинг барча босқичларидан муваффақиятли ўтган ўзбекистонликлар Ташқи меҳнат миграцияси агентлиги билан уч томонлама шартнома тузадилар. Шундан сўнг улар учун Қатар давлатига бориш ва ишлаш учун зарур бўлган виза ҳужжатлари белгиланган тартибда расмийлаштириб берилади.