Германия Россия НАТОга ҳужум қилган тақдирда мудофаага қандай тайёргарлик кўрмоқда?

Гамбургнинг турар жойларидан бирида чуқур тун. Тўсатдан шовқин эшитилади: тунги осмонда вертолётлар айлана бошлайди, кўчалар бўйлаб эса узун ҳарбий техника колоннаси ҳаракатланади. Бундесвернинг бронетранспортёрлари устида қуролланган аскарлар жанговар шайлик ҳолатида турибди.

2026 йил 24–26 сентябрь кунлари ўтказилган Red Storm Charlie номли ҳарбий машғулотларда Германиянинг махфий мудофаа режаси синовдан ўтказилди. У НАТОнинг кенг кўламли ҳарбий режалари билан уйғунлаштирилган.

Ушбу режаларга кўра, Россия НАТОнинг шарқий қанотига ҳужум қилган тақдирда, нафақат порт шаҳри Гамбург, балки бутун Германия муҳим аҳамият касб этади. Мамлакат НАТОнинг юз минглаб ҳарбийларини, шунингдек, қурол-яроғ ва оғир ҳарбий техникани жойлаштириш ҳамда уларни фронтга ўтказиш учун асосий логистика марказига айланади.

Германия ташқи сиёсат жамияти (DGAP) хавфсизлик масалалари бўйича эксперти Айлин Матленинг DW нашрига айтишича, бу жуда батафсил ва махфий режа ҳисобланади.

«Унда НАТО иттифоқчилари Германиянинг айнан қайси ҳудудларига, жумладан, қайси портларига келиб тушиши ва мамлакат ҳудуди орқали ҳаракатланиш учун қайси йўналишлардан фойдаланиши аниқ белгилаб қўйилган», — дейди эксперт.

📝 Германия ҳарбий логистика маркази вазифасини бажаришга қай даражада тайёр?

Айлин Матле мамлакат инфратузилмасининг ҳолатини заиф нуқталардан бири деб ҳисоблайди. Унинг фикрича, Германия қўшинларни ташиш учун мўлжалланган кўприклар, автомобиль йўллари ва транспорт тармоқларига техник хизмат кўрсатиш ҳамда уларни таъмирлаш ишларини «анча тезроқ ва пухтароқ» амалга ошириши керак.

Бундан ташқари, мудофаа режасининг махфийлигини сақлаш ҳам муҳим. Хусусан, НАТО қўшинларини кўчиришнинг аниқ йўналишлари каби махфий маълумотларнинг Россия қўлига тушишига йўл қўймаслик зарур.

Шу билан бирга, режанинг айрим қисмлари жамоатчиликка очиқ бўлиши лозим. Чунки бундай мудофаа чораларини амалга оширишда ҳукумат ва армия фуқаролик жамиятининг қўллаб-қувватлашига муҳтож.