Фридрих Мерцнинг атрофидагилари канцлерни муддатидан олдин алмаштириш ҳақидаги миш-мишларни рад этди

dpa агентлигининг хабар беришича, ҳукумат раҳбарига яқин бўлган манбалар канцлерни алмаштириш эҳтимоли атрофидаги муҳокамаларни "содда ғоя" деб ҳисоблашмоқда. Уларнинг фикрича, бундай муҳокамалар "низоларни авж олдиришга бўлган хавфли мойиллик" ҳамда "конституция ва сиёсий воқеликдан бехабарлик"ни кўрсатади.

Мерцнинг атрофидагилар бу каби миш-мишлар "Германия учун муқобил" ўта ўнгчи партияси тегирмонига сув қуйишини ва сиёсий марказнинг обрўсизланишига олиб келишини таъкидламоқда.

Аввалроқ Stern нашри ва Bild таблоиди Фридрих Мерц раҳбарлик қилаётган консерватив Христиан-демократик иттифоқ (ХДИ) партиясида унинг эҳтимолий алмаштирилиши бўйича муҳокамалар кетаётгани ҳақида мақолалар эълон қилган эди.

"Ўзгаришлар канцлери" ролига муносиб номзодлар сифатида Шимолий Рейн-Вестфалия бош вазири Хендрик Вюст, Бавария бош вазири Маркус Зёдер ва ХДИ/ХСИ парламент фракцияси раҳбари Йенс Шпанлар тилга олинган.

Die Welt нашрининг қайд этишича, амалдаги канцлерни алмаштириш каби сиёсий қадам конституциявий нуқтаи назардан жуда мураккаб жараён ҳисобланади. Мерц амалдаги бундестаг таркибида канцлер қайта сайланиши учун ё ўзи йўл очиб бериши, ёки ўз партиясининг кучли босими остида бунга рози бўлиши керак эди. Ушбу тахминий вазиятда ҳукумат тепасидаги ХДИ/ХСИ ва Германия социал-демократик партияси (ГСДП) коалицияси ворислардан бирини биргаликда сайлаши тўғри келарди.

Бироқ, ХДИдаги манбаларга кўра, ҳозирги вақтда канцлерни алмаштириш масаласи кўриб чиқилаётгани йўқ ва Мерцнинг истеъфога чиқиш ниятида эканлигидан далолат берувчи ҳеч қандай белги мавжуд эмас.