Путин ва Кабаеванинг фарзандларига Европадан 20 нафар тарбиячи ёлланган

Россия президенти Владимир Путин 2026 йил январ ойида кичик фарзандлари учун уч нафар гувернантканинг (тарбиячи) маошига камида 3,5 миллион рубл (49 минг доллар) сарфлаган. Бу ҳақда “Система” лойиҳаси ўзининг тегишли суриштирувида маълум қилди.

Журналистлар Путин ва собиқ гимнастикачи Алина Кабаеванинг ўғиллари билан шуғулланадиган ходимларнинг ишига оид ҳужжатлар ва ёзишмалар билан танишишга муваффақ бўлди. Путиннинг кенжа фарзандлари — Иван (2015 йилда туғилган) ва Владимир (2019 йилда туғилган) 2026 йил бошига кўра, камида учта тарбиячига эга бўлган. Босния ва Герцеговина фуқароси София.Б, Германия фуқароси Ирен.Э ва Жанубий Африка Республикаси фуқароси Кэрол.Р шулар жумласидандир.

Путиннинг болалари билан ишлайдиган аёл ходимларга тўланадиган тўловлар индивидуал тарзда, ишлаган соатларига қараб ҳисобланади. Расмий равишда, тарбиячилар Путиннинг яқин дўсти Юрий Ковалчук ва президентнинг қизи Мария Воронцова билан боғлиқ бўлган “Согаз” халқаро тиббиёт маркази касбий қайта тайёрлаш институтининг “етакчи таржимонлари” сифатида расмийлаштирилган. Бу уларга “юқори малакали мутахассислар” сифатида Россияда ишлаш учун виза ва рухсатномалар олиш имкониятини берган.

"Атиги тўққиз йил ичида Путин ва Кабаева оиласида 20 га яқин ўқитувчи ишлаган. Одатда бир вақтнинг ўзида бола билан 4–6 киши шуғулланган. Уларнинг бир қисми параллел равишда, бошқа қисми эса бир-бирини алмаштириб ишлаган. Мураббийлар вазифасига чет тилларини ўргатиш ҳам кирган. Уч яшар Иваннинг дарс жадвалига инглиз ва немис тиллари киритилган", дейилади суриштирув материалида.

Ҳужжатлардан маълум бўлишича, 2019 йилда тарбиячиларга Иван тўрт ёшга тўлгунига қадар доимий равишда “тил муҳити”га тушиши кераклигини айтилган. Унинг инглизча нутқи “саводли европаликнинг нутқи” каби равон бўлиши талаб этилган. Немис тилини ўргатишга ҳам шунга ўхшаш талаблар қўйилган.

Путин ва Кабаева фарзандларининг исмлари ва туғилган саналари аввалроқ “Досье” маркази томонидан аниқланганди. Марказ суриштирувига кўра, Иван ва Владимир асосан президентнинг Валдайдаги қароргоҳида яшайди.