"Энди барчасини тўғрилаш вақти келди"

Мен ўз жамоам билан президент Трампнинг кучли раҳбарлиги остида барқарор тинчликка эришиш учун ҳамкорликда ишлашга тайёрман, деди Украина президенти.

Владимир Зеленский АҚШ раҳбари билан Оқ уйда юз берган баҳсдан сабабли Вашингтон Киевга ҳарбий ёрдамни тўхтатганидан кейин, Х ижтимоий тармоғида ўз баёнотини эълон қилди.

Украина президенти баёнотида Россия билан тинчликка эришиш йўлидаги дастлабки қадамларни санаб ўтди:

"Биринчи босқичда асирларни озод қилиш ва ҳаво ҳудуди орқали ўт очишни тўхтатишга эришиш мумкин. Бу узоқ масофага учувчи ракета ва дронларни қўллашни тақиқлаш, энергетика ва бошқа фуқаролик инфратузилмасига ҳужумларни тўхтатишни ўз ичига олади. Агар Россия ҳам бунга амал қилса, дарҳол денгиздаги сулҳ ҳам амалга оширилиши керак," — деб ёзди Зеленский.

Украина президенти шунингдек, АҚШ билан якуний келишувга эришиш учун барча кейинги қадамларни тезда босиб ўтишни исташини таъкидлади.

"Мен Қўшма Штатлар билан фойдали қазилмалар ва хавфсизлик бўйича келишувни исталган вақтда ва исталган шаклда имзолашга тайёрман. Бу келишувни катта хавфсизлик кафолатлари сари муҳим қадам сифатида кўраман ва у самарали ишлашига чин дилдан умид қиламан", — дея таъкидлади Зеленский.

Шунингдек, у Оқ уйда Доналд Трамп билан учрашуви кутилганидек ўтмаганини афсус билан қайд этди.

"Энди барчасини тўғрилаш вақти келди. Биз келажакдаги ҳамкорлик ва мулоқот конструктив бўлишини истаймиз", — дея қўшимча қилди Зеленский.

Украина президенти шунингдек, АҚШ томонидан етказиб берилган Javelin ракета мажмуалари учун миннатдорчилик билдирди.

Aввалроқ Доналд Трамп айнан унинг президентлиги даврида Украинага ушбу турдаги қуроллар етказиб берилгани ва улар урушнинг дастлабки босқичида Россия танкларини тўхтатишга ёрдам берганини таъкидлаган эди.