Ҳозирда ҳолат юзасидан суд-тиббий экспертизаси тайинланган.

Маълумотларга кўра, хорижда яшаб таҳсил олаётган 16 ёшли мактаб ўқувчиси таътилда бувисини кўргани Самарқандга келган. У нафас олишда қийналаётгани учун 1 июль куни бувиси билан вилоят марказий шифохонасига борган. Шифокорлар унга жарроҳлик амалиёти ўтказилиши кераклигини айтишган.

“Учта шифокорни кўрдим. Учаласи ҳам шу операцияни қилиш кераклигини айтишди. Бурни салгина қийшиқ экан. Соат 11 ларда операцияга олиб кирди. Кутдим, лекин операция давом этаётганини, набирам ҳали ҳушига келмаганини айтишди. Тахминан бир ярим соат ўтгач, операция бўлимига бир гуруҳ шифокорлар аппарати билан кириб келишди. Шундан сўнг неварамни кислородга уланган замбилда олиб боришди”, - деди марҳуманинг бувиси.

Операциядан кейин беморнинг саломатлиги ёмонлашган ва у вафот этган.

Ҳозирда ҳолат юзасидан вилоят прокуратураси томонидан суд-тиббий экспертизаси тайинланди. Терговга қадар текширув ва расмий текширувлар олиб борилмоқда.