Россияга миллионлаб ҳиндистонлик ишчилар келадими?

9 июль куни Урал савдо-саноат палатаси раҳбари Андрей Беседин йил охиригача Россияга 1 миллионгача ҳиндистонлик ишчи келиши мумкинлигини айтди.

Унинг сўзларига кўра, бу келишувларга Свердловск вилояти ҳам киради, бу ерда металлургия ва машинасозлик корхоналарида ишчи кучи етишмаяпти. Баъзи оммавий ахборот воситалари, Екатеринбургда ҳиндистонлик ишчиларни қабул қилишни осонлаштириш учун Ҳиндистон консуллиги очилиши режалаштирилаётганини ҳам ёзмоқда.

Ишчи кучи етишмовчилигининг сабаби – чақирув ва ёшлар ишлаб чиқариш корхоналарида ишлашни хоҳламаслиги. Россиянинг барча ҳудудларида ишчи кучи етишмаслиги ва туғилиш кўрсаткичининг рекорд даражада пасайиши кузатилмоқда. Украинада уруш бошланганидан кейин ишчи кучи етишмовчилиги 1,5-2 миллион кишига етди.

Беседин айтишича, Ўзбекистондан ва бошқа собиқ иттифоқ республикаларидан келган мигрантлар рус тилини билгани ва маданиятга яқинлиги сабабли мослашиши осон, аммо ҳиндистонликлар ва ланкаликлар билан мулоқот қийин бўлади. У Шри-Ланка ва Шимолий Кореяни ҳам потенциал ҳамкорлар сифатида номлади.

Шу билан бирга, Меҳнат вазирлиги 1 миллион ҳиндистонлик ишчилар келиши ҳақидаги маълумотни рад этди: йиллик чеклов фақат 234,9 минг нафар хорижий ишчини қамраб олади.

Айни пайтда айрим рус компаниялари ҳиндистонлик мутахассисларни ёллашни бошлади. Март ойида «Самолёт» компанияси ҳиндистонлик қурувчиларни жалб қилиш бўйича пилот лойиҳа ўтказди, аммо тил тўсишлари ва маданий фарқлар муаммога айланди, деди компаниянинг операцион директори Алексей Акиндинов.

Оммавий ахборот воситалари хабар беришича, X5 супермаркетлар тармоғи (Пятёрочка ва Перекрёсток) ҳиндистонликларни логистика бўлимига, Ozon эса омборлар ва IT бўлимларига ёлмоқда. Ўтган йили фақат Санкт-Петербургда 4 мингдан ортиқ ҳиндистонлик иш излаган.

Саноатчилар ва тадбиркорлар уюшмаси Россия эҳтиёжлари учун Ҳиндистонда касб-ҳунар коллежлари очишни таклиф қилди, бу ғоя Таълим вазирлиги томонидан қўллаб-қувватланди. Аммо миллионлаб ишчилар ҳақида аниқ маълумотлар ҳозирча йўқ.