Чўнтакка зарба: Гўшт нархи “учиб кетди” – Ўзбекистонда март ойида 9,1% ошди!

Ўзбекистонда март ойида гўшт нархи 9,1 фоизгача ошган.

Статистика қўмитаси инфляция ҳисоботида маълум қилишича, 2025 йилнинг март ойида Ўзбекистонда инфляция даражаси 0,9 фоизни ташкил этди.

Бу кўрсаткич, ўтган йил март ойидаги кўрсаткичдан 0,67 фоиз юқори, аммо 2022 йил (1,53 фоиз) ва 2023 йилнинг (1,01 фоиз) мос давридаги инфляция кўрсаткичларидан паст.

Йиллик инфляция 2024 йилнинг март ойига нисбатан 10,3 фоизгача тезлашди. Февраль ойида 10,13 фоиз эди.

Март ойида озиқ-овқат маҳсулотлари нархлари 1,5 фоизга (йиллик ҳисобда 3,6 фоизга), ноозиқ-овқат маҳсулотлари нархи 0,2 фоизга (7,4 фоиз), пуллик хизматлар нархи 0,7 фоизга (27,1 фоиз) ошди.

Март ойида нархларнинг асосий ўсиши қуйидаги озиқ-овқат маҳсулотларида кузатилди: мол гўшти – 8,3-8,8 фоиз (йиллик ҳисобда 18,5 фоиз), қўй гўшти – 9,1 фоиз (19,4 фоиз), қийма – 5,4 фоизга ошди. Солиштириш учун: январь-февраль ойларида мол гўшти 1,1 ва 2,8 фоизга, қўй гўшти 1,2 ва 2,4 фоизга қимматлаганди.

Бунинг фонида товуқ гўшти нархи 0,1−0,6 фоизга, тирик балиқники 1,7 фоизга ошди. Бошқа асосий озиқ-овқат маҳсулотларидан сариёғ 1,1 фоизга, сут 0,9 фоизга, алкоголсиз ичимликлар 0,5 фоизга қимматлади.

Нархлар пасайиши гуруч ва гуруч оқшоғи (-2,3 фоиз), шунингдек, буғдой унида (-1,4 фоиз) кузатилди.

Мева-сабзавот маҳсулотлари нархлари динамикаси мавсумий омил асосида шаклланди. Ой давомида мева ва ёнғоқлар нархи сезилмас даражада ошди (ўртача 0,1 фоизга).

Сабзавотлар, илдизмевалар ва дуккаклилар нархи ўртача 0,3 фоизга қимматлади, жумладан, сабзи нархи 15,7 фоизга, помидорники 4,3 фоизга, булғор қалампириники 3,8 фоизга, карам ва саримсоқники 2,6 фоизга, пиёзники 1,9 фоизга ошди.

Нархларнинг пасайиши бодринг (-14,7 фоиз), картошка (-3,7 фоиз), тузланган ва маринадланган сабзавотлар, томат пастасида (0,1−0,7 фоиз оралиғида) кузатилди.

Қўмита хабарида, негадир электр энергияси, газ, метан, пропан, бензин ва бошқа кўплаб товарлар бўйича инфляция ҳақида маълумотлар келтирилмаган.

Март ойидан бошлаб Сурхондарё вилоятида маиший чиқиндиларни олиб чиқиб кетиш учун тўлов нархи, Тошкент шаҳри ва Сирдарё вилоятида эса кўп қаватли уйларда техник хизмат кўрсатиш тўлови нархи оширилди. Республика бўйича ўртача ҳисобда ушбу хизматлар учун тарифларнинг ошиши 4 фоизни ташкил этди. Турар жой биноларини сақлаш ва таъмирлаш учун материаллар нархи ўртача 0,2 фоизга пасайди.

Март ойида авиачипталар февраль ойидаги 22,4 фоизлик ошишдан кейин ўртача 4,4 фоизга (ички қатновлар 3,9 фоизга, халқаро рейслар 4,8 фоизга) қимматлади.

Кузатилаётган операторлар орасида мобиль алоқа хизматлари нархлари ўртача 3,5 фоизга ошди.

Қўмитанинг инфляция ҳисоботи шакли ва мазмунига ўзгартиришлар киритилди. Йиллик кўрсаткичда энг юқори инфляция даражаси Тошкент шаҳри (12 фоиз), Сурхондарё (11,2 фоиз) ва Бухоро (10,7 фоиз) вилоятларида, ойлик ҳисобда эса Сурхондарё (1,2 фоиз) ва Жиззах (1 фоиз) вилоятларида қайд этилди.