Боксчимиз WBC Гранд-присида иккинчи ғалабасига эришди

Саудия Арабистонининг Ар-Риёд шаҳрида профессионал бокс бўйича WBC Гранд-присининг навбатдаги босқичи бошланди.

Тўртта дивизионда ташкил этилаётган Гранд-прининг бугунги беллашувлари доирасида супер энгил вазн тоифасида ўзбекистонлик чармқўлқоп устаси Мужибилло Турсунов рингга кўтарилди.

Ҳамюртимизга Аргентина вакили Алан Эзикел Дутра рақиблик қилди.

Аҳамиятлиси, 6 раундлик беллашув тўлиқ давом этиб, якунда Мужибилло очколар ҳисобига кўра зафар қучди. Бу ғалаба орқали Турсунов WBC Гранд-присининг чорак финал босқичи чиптасини қўлга киритди.

Эндиликда Андижонда туғилган Мужибилло Турсунов ҳисобида 7 та жангда қўлга киритилган 7 та ғалаба мавжуд. Алан Дутра эса бугун фаолиятидаги 16-жангида илк бор мағлубият аламини тотиб кўрди.