2026 йил августидан буён нефть ва газ ташувчи танкерларга қатор киберҳужумлар уюштирилган. Ҳодисалар АҚШга тегишли кемаларга қаратилган мақсадли киберкампаниянинг бир қисми бўлиши мумкин. Бу ҳақда Россиянинг «Нефтегаз» саноат нашрига таяниб, Tasnim News хабар берди.

Маълум қилинишича, сўнгги ҳодиса 22 октябрь куни содир бўлган. Ўшанда Маршалл ороллари байроғи остида сузувчи, суюлтирилган нефть гази (СНГ) ташувчи «Ботан» кемаси киберҳужумга учраган. У Сингапурдан АҚШнинг Техас штатидаги Нидерленд терминалига йўл олган эди.

Манбаларнинг айтишича, ҳужум натижасида кеманинг юкни кузатиш ва бошқариш тизимларида жиддий узилишлар юзага келган. Капитан ва кема эгаси бу ҳақда АҚШ соҳил қўриқлаш хизматига махфий равишда хабар берган. Бироқ, хабарда таъкидланишича, сиёсий мулоҳазалар ва нефть-газ бозоридаги кескинлик сабабли ҳодисани ошкор қилмаслик сўралган.

Бундан аввал, август ойининг охирида Либерия байроғи остида сузувчи «Ви-Эл Просперити» танкери Гибралтар яқинида киберҳужумга учраган. Кема Техасга етиб келгач, АҚШ соҳил қўриқлаш хизмати ва Федерал хавфсизлик хизмати ходимлари уни текшириб, киберҳужум содир бўлганини тасдиқлаган.

Сентябрь ойи бошида эса Либерия байроғи остидаги суюлтирилган табиий газ ташувчи «Вивит Африка» кемаси Италия қирғоқлари яқинида киберҳужумга дуч келган. Ҳодиса жиддий техник носозликка сабаб бўлган ва кема бир неча ҳафта давомида юкини тушира олмаган.

Хабарда, шунингдек, «Кохаку» кемаси ҳам ушбу киберҳужумлар тўлқинидан зарар кўрган кемалар қаторида тилга олинган. Бироқ ундаги ҳодисанинг тафсилотлари очиқланмаган.