АҚШ вакиллари Украинадаги можарони тугатиш бўйича музокараларда олға силжишга умид қилмоқда

АҚШ музокарачилари Украинадаги можарони тугатиш бўйича саъй-ҳаракатларда янада олға силжишга умид қилмоқда. Бу ҳақда Reuters АҚШ делегацияси таркибида Киевга борган Жаред Кушнер баёнотига таяниб хабар берди.

Аввалроқ Украинадаги «Общественное» телеканали Киевда АҚШ президентининг махсус вакили Стив Уиткофф ва Кушнернинг Владимир Зеленский билан музокараларининг иккинчи босқичи бошланганини хабар қилган эди. Унда Буюк Британия, Франция ва Германия вакиллари ҳам иштирок этмоқда.

«Киевга ташриф буюрган АҚШ делегацияси тинчлик музокараларида янада олға силжишга умид қилмоқда», — деб Кушнернинг сўзларини келтиради Reuters.

Агентлик қайд этишича, музокараларнинг биринчи босқичи якунлари бўйича журналистлар олдида қилган қўшма чиқишида Стив Уиткофф АҚШ томони музокаралар жараёнидан «жуда руҳланганини» билдирган. У музокараларни «мазмунли» ва «муҳим» деб атаган.

Бундан бир кун олдин Кремлда Владимир Путин Стив Уиткофф ва Жаред Кушнер билан учрашган. Музокаралар қарийб уч соат давом этган. Россия томонидан учрашувда президент ёрдамчиси Юрий Ушаков ва Россия тўғридан-тўғри инвестициялар фонди (РФПИ) раҳбари, Россия президентининг хорижий давлатлар билан инвестиция-иқтисодий ҳамкорлик бўйича махсус вакили Кирилл Дмитриев ҳам иштирок этган.