Zelenskiy va AQSh vakillari muzokaralar yakunlarini ma’lum qildi: Donbass masalasi asosiy bo‘lib qolmoqda

Ukraina prezidenti Vladimir Zelenskiy AQShning maxsus vakili Stiv Uitkoff va Jared Kushnerning Kiyevga tashrifini «muhim va samarali» deb atadi. Uning so‘zlariga ko‘ra, tomonlar bir nechta yangi g‘oya va Ukrainaga ehtimoliy qishki yordam paketini muhokama qilgan.

Zelenskiy urush qishda ham davom etishi ehtimoli yuqori ekanini ta’kidladi. Uning aytishicha, Donbass ustidan nazorat masalasi muzokaralardagi asosiy mavzulardan biri bo‘lib qolmoqda. Shuningdek, Ukraina Qurolli kuchlarining frontdagi kuchli pozisiyasi Kiyevga ultimatumlarsiz diplomatik muzokaralar olib borish imkonini berayotganini aytdi.

Uitkoff muzokaralarni «mazmunli va muhim» deb atab, AQSh natijalardan «juda ruhlanganini» bildirdi. Kushner esa Vashington uch tomonlama muzokaralar formatiga qaytishni istashini aytdi. Uitkoffning so‘zlariga ko‘ra, yangi uch tomonlama uchrashuv haqida «yaqin vaqt ichida» e’lon qilinishi mumkin.

AQSh vakillari Kiyevga avval muhokama qilingan kelishuv hujjatlarining o‘zgargan sharoitlarni hisobga olgan holda yangilangan variantlarini ham olib kelgan. Biroq ularda yangi g‘oyalar ko‘p emas, muzokaralarning markaziy masalasi esa hamon Donbass ustidan nazorat bo‘lib qolmoqda.

Zelenskiyning ma’lum qilishicha, tomonlar urush harakatlari tugaganidan keyin Ukraina uchun xavfsizlik va iqtisodiy kafolatlarni ham muhokama qilgan. Kushner esa AQSh Ukrainadagi mojaroni hal qilish bo‘yicha yangi «tinchlik paketi»ni ishlab chiqish ustida ishlayotganini aytdi.

Ukraina prezidenti, shuningdek, harbiylarni ta’minlash, gumanitar ehtiyojlar va mudofaa sanoati uchun mablag‘ yetishmayotganini ma’lum qildi. Uning aytishicha, Rossiya so‘nggi kunlarda hujumlarni kuchaytirgan va Kiyev bunga javob qaytaradi.

Financial Times ma’lumotlariga ko‘ra, muzokaralar ishtirokchilari urush qishga qadar tugashi ehtimoli kam ekanini tan olgan. Biroq AQSh qish boshlangunga qadar ma’lum bir taraqqiyotga erishish va Ukrainaning og‘ir qishki davrga tayyorgarligiga yordam berish mumkin, deb hisoblamoqda.