Zelenskiy Trampning Rossiyaga qarshi sanksiyalarni bekor qilish qarorini «Amerika sanksiyaviy blekauti» deb atadi

Ukraina prezidenti Vladimir Zelenskiy AQSh prezidenti Donald Trampning Rossiyaga qarshi sanksiyalar joriy etishdan voz kechish qaroriga munosabat bildirdi. Gap marhum senator Lindsi Grem nomi bilan bog‘liq qonunda nazarda tutilgan cheklovlar haqida bormoqda.

Juma kuni kechqurun Tramp farmonni imzoladi. Unga muvofiq, Rossiyaga qarshi yangi keng ko‘lamli sanksiyalar hamda Rossiyadan neft va gaz sotib oluvchi davlatlarga nisbatan tariflar joriy etilishi ko‘zda tutilgan, biroq ular darhol bekor qilingan.

Shanba kuni ertalab Zelenskiy Rossiya harbiylari Ukraina energetika infratuzilmasiga kuchli zarbalardan birini berganini ma’lum qildi. Uning so‘zlariga ko‘ra, mamlakatning turli hududlarida elektr energiyasini ishlab chiqarish va uzatishga oid 15 dan ortiq muhim ob’ekt hujumga uchragan.

Ukraina rasmiylari zarbalar oqibatida Jitomir viloyatida yuz minglab iste’molchilar elektr ta’minotisiz qolganini, Vinnisa shahrida ham elektr energiyasi o‘chirilganini bildirdi. Mamlakat bo‘ylab rejali elektr uzilishlari joriy etilgan.

«Rossiyaliklar energetikamizga bunday keng ko‘lamli zarba bergan bir paytda, afsuski, Amerikada Lindsi Grem qonunini amalda butunlay e’tiborsiz qoldirishga qaror qilindi. Holbuki, bu qonun urushni to‘xtatish uchun Rossiyaga haqiqiy bosim o‘tkazishi kerak edi», — dedi Zelenskiy.

Uning ta’kidlashicha, ushbu qonun Ukrainaga katta yordam berishi mumkin edi va hali ham shunday imkoniyat mavjud. Buning uchun esa qonun amalda ishlashi zarur.

«Amerikaning sanksiyaviy blekauti, tajovuzkorga bosimning yumshatilishi va Putin uchun moliyaviy mukofotlar — bularning barchasi uni hujumlarni davom ettirishga undaydi. Mavqeimizni boy bermasligimiz va urushni tugatishga harakat qilishimiz kerak», — deya xulosa qildi Ukraina prezidenti.

Avvalroq Zelenskiy Trampning Rossiya bilan dizel yoqilg‘isi yetkazib berish bo‘yicha kelishuvini ham tanqid qilgan edi. Kelishuvga ko‘ra, Moskva jahon bozoriga bir necha partiya dizel yoqilg‘isi yetkazib berishi kutilmoqda.

Tramp ushbu chora orqali Eron bilan urush fonida AQSh Kongressiga oraliq saylovlar arafasida ko‘tarilgan dizel narxlarini pasaytirishga umid qilmoqda.