XJC rasmiy ravishda Mo‘g‘ulistonni Putinni hibsga olish orderini bajarmaganlikda aybladi

Xalqaro jinoiy sudi (XJC) Mo‘g‘uliston ishini Rossiya prezidenti Vladimir Putinning mamlakatga tashrifi chog‘ida hibsga olish va ekstradisiya qilishdan bosh tortgani uchun Rim statuti taraflariga topshirdi, deb yozadi The Washington Post.

«Ishtirokchi-davlatlar va sud yurisdiksiyasini qabul qilganlar, ularning rasmiy maqomi yoki fuqaroligidan qat’i nazar, XJC orderiga ega bo‘lgan shaxslarni hibsga olishlari va ekstradisiya qilishlari shart», — deyiladi sud bayonotida.

Sud qanday choralar ko‘rishi noma’lum. Putin Mo‘g‘ulistonda bo‘lganida, sud tashkilot «o‘zi tegishli deb hisoblagan har qanday choralarni ko‘rishi» mumkinligini aytdi.

Putin sentyabr oyi boshida Xalxin-Gol daryosi bo‘yidagi janglarda sovet va mo‘g‘ul qo‘shinlarining Yaponiya ustidan qo‘shma g‘alaba qozonganligining 85 yilligini nishonlash uchun Mo‘g‘ulistonga (Rim statutiga a’zo davlat) uchib ketdi. Yevropa Ittifoqi va Ukraina hukumati, shuningdek, Human Rights Watch va Amnesty International Putinni hibsga olishga chaqirdi. Putinni hibsga olish talabi bilan xuddi shunday petisiyaga avvalroq rossiyalik urushga qarshi ijtimoiy faollar imzo chekkan edi.

Putinni Mo‘g‘uliston poytaxtida tantanali kutib olish paytida rus qo‘shinlari Poltavaga zarba berib, Rossiyaning shaharga qilgan eng qonli hujumlaridan birida o‘nlab odamlarni o‘ldirdi.

Mo‘g‘uliston hukumati vakili Politico nashriga bergan intervyusida mamlakat energetika bo‘yicha Rossiyaga qaram va shuning uchun rasmiylar Putinni hibsga ololmasligini aytdi.